Kwayedza
Kingstone Mapupu
MAPURISA eZimbabwe Republic Police (ZRP) ekuChipinge vasunga vatyairi vatatu vemarori emagonyeti ayo anonzi aiyambutsa mafuta edzimotokari nechitsotsi kubva kuMozambique kuuya munyika muno ndokuwanikwa peturu inosvika marita 58 760.
Mutauriri wemapurisa kudunhu reManicaland, Inspector Nobert Muzondo vanoti vakasungwa ndiKenneth Nyamapfeni (25) wekuHatfield muguta reHarare, Walter Chigamba (38) wekuKuwadzana muHarare naDanmore Kandiyedo (41) wekuChitungwiza.
“Nemusi wa24 Chivabvu nenguva dza8 husiku, mapurisa eZRP Chipinge vakawana mashoko ekuti kwaiva nemarori matatu aitakura mafuta edzimotokari nechitsotsi kubva kuMozambique vachishandisa muganhu wechitsotsi wekuBuffallo Downs. Mapurisa akanogaririra musango panosangana mugwagwa uyu neweTakura Dam Turn Off kusvika nenguva dza3 mangwanani apo pakabva pasvika rori yerudzi rweDAF ine nhamba dzinoti ADS-7744 iyo yaityairwa naKenneth Nyamapfeni uyo akabva asungwa ipapo,” vanodaro Insp Muzondo.
Vanoti pakasungwa mutyairi uyu, akashaya magwaro anoratidza kuti anobvumirwa kutakura mafuta edzimotokari kubva kuMozambique kuuya munyika muno.
Mutyairi uyu akazotungamirira mapurisa kuenda kunzvimbo yeBossclooff uko kwaivawo nerimwe rori rerudzi rweERF rine nhamba dzinoti ADC 5976 raifambiswa nemumugwagwa wemusango richityairwa naWalter Chigamba uyo akabva asungwawo.
“Mutayiri uyu achibvunzwa, akabvuma kuti aiva nemafuta emotokari uye aisava nemagwaro ekuti apinde nawo munyika muno. Rori iri ndere kambani inowanikwa muHarare.
“Nemusi wakare nenguva dza4 mangwanani, vatyairi vaviri ava vakabatsira kutevera rimwezve gonyeti raiva pachikoro cheMvurachena School apo pakawanikwa pakamiswa rori rerudzi rweDAF rine nhamba dzinoti AEU 3583 raityairwa naDanmore Kandiyedo. Mutyairi uyu akabva asungwa akawanikwa zvakare asina magwaro ekutakura mafuta edzimotokari,” vanodaro Insp Muzondo.
Vatyairi vatatu ava vakachengetedzwa nemapurisa vakamirira kupinda mudare reChipinge Magistrate Court nekuda kwemhosva yavari kupomerwa yekupinza zvinhu munyika zviri kunze kwemitemo.
“Tinonyanya kutenda veruzhinji nekuda kwekuwanisa mapurisa mashoko akaita kuti vatatu ava vasungwe. Tinoyambira ruzhinji kuti kuita kwakadai imhosva inoita kuti vanhu vasungwe vachienda kumatare edzimhosva,” vanodaro Insp Muzondo.
