Kwayedza
Abel Ndooka
VARAIRIDZI vechikwata cheReal Betis Balompie chekuSpain, icho chinokwikwidza muSpanish La Liga Santander, vari kutarisirwa kuuya muZimbabwe mwedzi unotevera kuzodzidzisa nhabvu varairidzi vemuno nekuongorora vatambi vakasiyana.
Real Betis ine academy yenhabvu iri munyika muno iyo inonzi Real Betis Academy Zimbabwe uye gore radarika vamwe vari kubatsirwa neacademy iyi vakawana mukana wekuenda kuSpain uko vakanodzidziswa zvenhabvu.
Real Betis yekuSpain inorairidzwa naManuel Pellegrini chizvarwa chekuChile uye mwaka uno yakagara pechishanu palogo remuLa Liga apo iri kurwira chinzvimbo chekupinda mumutambo weUEFA Champions League mwaka unotevera.
Sachigaro weReal Betis Academy Zimbabwe – Gerald Sibanda – anoti varairidzi vechikwata ichi vachauya muno nemusi wa18 Chivabvu. Pari kuuya varairidzi vari kubva kuSpain ava, pachange pane zvikwata zvakasiyana zvichatatsurana mumutambo wemazuva matatu.
Varairidzi veReal Betis Balompie vachange vachiona mitambo iyi uye vachidzidzisa zvikwata izvi pamwe nevarairidzi vacho.
Chikwata cheReal Stars chekuMbare chakatamba neReal Betis Academy paIndependence Challenge Friendly nemusi weChipiri chino muHarare apo zvikwata zviviri izvi zvakatatsurana mumitambo yemazera anoti Under-9, 10, 12, 14 ne16.
Vatambi veReal Betis Zimbabwe (vakapfeka zvegreen) vakasangana neveReal Stars Mbare vapedza kutamba nemusi weChipiri
chino
Sibanda anoti kuuya kwevarairidzi veReal Betis kuchabatsira zvakanyanya nhabvu yemuno sezvo varairidzi vemuZimbabwe vachadzidza zvakawanda.
“Varairidzi veReal Betis Balompie vari kuuya muZimbabwe mwedzi unotevera kuzoona basa ratiri kuita munyika uye vachawana mukana wekudzidzisa varairidzi vemuno nhabvu yepamusoro.
“Kuuya kwavo kunotevera kushanya kwatakaita mwedzi yadarika apo takamboenda kuSpain kuReal Betis tikanoita masvondo tiriko tichiita gadziriro dzedu navo vachiongorora vatambi vedu vakasiyana.
“Kutaura kuno, tine vatambi vaviri vakatotorwa neReal Betis Balompie asi vachiri muno, saka pachauya varairidzi vechikwata ichi vachaona matambiro ari kuita vatambi ava. Mumwe wacho atove kuSimba Bhora saka vanoda kuona matambiro ake,” anodaro Sibanda.
Anoenderera achiti: “Iye zvino tiri kuronga mutambo uchange uine zvikwata zvakasiyana zvichatatsurana pamazuva ayo varairidzi veReal Betis Spain vachange vari muno. Chimwe chezvikwata zvichange zviripo iReal Stars yekuMbare iyo tine hukama hwakasimba nayo.”
