Varimi vegorosi vanoda rutsigiro rwakasimba

23 May, 2024 - 15:05 0 Views
Varimi vegorosi vanoda rutsigiro rwakasimba Prof Jiri

Munyori weKwayedza

CHIKAMU chezvekurima chinoda rutsigiro rwakasimba rwemapoka akasiyana, kusanganisira anobatsira nemari yekushandisa, kuitira kuti varimi vakwanise kurima mahekita 120 000 egorosi mwaka uno wechando.

Izvi zvakabuda pamusangano weWheat Based Food Security: Zimbabwe’s Best Foot Forward Conference wakarongwa nekambani yeZimpapers yakabatana nebazi rezveminda, kurima, hove, mvura nekusimudzirwa kwemaruwa muHarare nemusi weChitatu chino.

Vachitaura pagungano iri, munyori mukuru mubazi rezveminda, kurima, hove, mvura nekusimudzirwa kwemaruwa — Professor Obert Jiri — vanoti kurimwa kwemahekita 120 000 egorosi kuchaita kuti Zimbabwe ikwanise kuvhara mukaha wakavepo zvichitevera nzara yakakonzerwa nekusanaya kwemvura mwaka wezhizha wadarika.

“Mwaka wekurima wa2023/24 ndiwo wakanyanya panyaya yekusanaya kwemvura mumakore 43, kurimwa kwechikafu kwakadzikira nechikamu che77 percent kana zvichienzaniswa nemwaka wadarika,” vanodaro.

Kurimwa kwegorosi rakawanda nenzira yemadiridziro, vanodaro Prof Jiri, ndiyo imwe yenzira dzekuvhara mukaha wekudzikira kwegoho rechibage uyo wakakonzerwa nekusaya kwemvura mumwaka wezhizha.

Vachitaura pachiitiko chimwechete ichi, mukuru weAFC Group, VaFrancis Macheka, vanoti kambani yavo iri kusimudzira mabasa ebudiriro nekushandura nyaya dzekurima muZimbabwe.

“Tinoda kuona kuti munhu wese ane chekuita nebudiriro yenyika,” vanodaro VaMacheka.

Vanotiwo AFC iri kutsigira kurimwa kwegorosi remuchando mwaka uno munyika yose.

Sachigaro weGrain Millers Association of Zimbabwe, Dr Tafadzwa Musarara, vanoti  kurimwa kwegorosi kuri kubatsira zvakanyanya kuderedza mari inoshandiswa neHurumende mukutenga chirimwa ichi kunze kubva muna1980, sezvo nyika ichibura marofu echingwa 1,3 miriyoni pazuva.

Zvisinei, vanoti vari mubhizimisi rekugaya vari kusangana nezvimhingamipinyi zvakati kuti, kusanganisira nyaya dzekutumira mari pamwe nekutakura zvinhu zvekushandisa.

“Takanga tine matani egorosi aiuya nekuBeira achipinda muHarare izvo zvakaona pachive nematambudziko maringe nemafambisirwo ebasa iri. Takavawo nematambudziko maringe nenyaya yekusagadzikana kwemitengo yepasi rose,” Dr Musarara vanodaro.

Vanoti vakakanganiswa zvekare neCovid-19, kunyange hazvo parizvino zvinhu zvadzokera pakare.

Zimpapers chief marketing officer, VaTapiwa Mandimutsira, avo vaiva vakamirira chamangwiza wekambani iyi, VaPikirayi Deketeke, vanoti zvakakosha kuti mapoka akasiyana ashande pamwechete kuti donzvo rekurima mahekita 120 000 egorosi rizadzikiswe.

“Tine basa rekuita pakuti tinopa ruzivo nedzidziso kunyika. Zvisinei, hatikwanise kuita izvi toga.

“Tinoshanda nemapoka anosanganisira bazi rezveminda, SeedCo, National Foods, Zinwa, ZETDC, Expert Choice nemamwe makambani akawanda ari muchikamu chezvekurima.

“Tine chivimbo chikuru chekuti patinotanga mushandirapamwe uyu, tinokwanisa kuzadzikisa zvatinoshuvira, kurimwa kwemahekita 120 000 egorosi,” vanodaro.

Share This:

Sponsored Links