Uncategorized

‘Varume mhene havadi Condom’ . . . ‘Vanongotibhadhara maUS$’

20 May, 2021 - 14:05 0 Views
‘Varume mhene havadi Condom’ . . . ‘Vanongotibhadhara maUS$’

Kwayedza

Patrick Shamba

VANHUKADZI vanoita basa rekutengesa muviri mudhorobha reBindura nenzvimbo dzakapoteredza vanoti vamwe vevarume “mhene” vavanotorana navo vachinosasana vanosarudza kuvabhadhara mari yakawanda – maUS$ – kuitira kuti vaite bonde pasina dziviriro yemakondomu.

Vachitaura neKwayedza svondo rapera – iyo yainge yashanyira vanhu ava pamwechete nesangano reNational Aids Council (NAC) – vasikana nevakadzi vakuru, vamwe vavo vatova vanaambuya, vanoti vane chido chekuita bonde rakadzivirirwa, asi vamwe varume vane mari avo vanovatora havadi kushandisa makondomu vachizvipira kubhadhara mari yakawanda.

Vamwe vevakadzi ava vanoti vakaroorwa asi vanopoya mudzimba vachinoita chipfambi senzira yekutsvaga mari.

Vakadzi vanoita basa iri muBindura vatova nechikwata chavo icho chinotova nekomiti yekuona mashandiro avo “pakufadza maclient”.

Asi vakawanda vavo vane mavende avanoti mazino anobva nekurohwa nevarume vavanosasana navo – “kunyanya makorokoza”.

Mumwe wevasikana ava, anoda kungozivikanwa saNono (19) uye kana vari “varume chaivo” anodanana ne50 kozotiwo vanongouya vachidarika vakawandisa, anoti akabva kuBulawayo achienda kuBindura kunoita chipfambi.

“Handitombozvinyara kuti ndinoita chipfambi nekuti ndiro basa. Ndizvo zvandakabvira kuBulawayo ndichiuya kuno kuBindura.

“Ndainge ndakaroorwa asi ndakazosiya murume nekuda kwekutevera vamwe vandaiona uye chikoro ndakasiira O-Level,” Nono anodaro.

“Varume vandinodanana navo zviri ‘serious’ vanosvika 50 asi kune vamwewo vanongonditora zvenguva pfupi. Hongu tinenge tichida kuti tisangane nevarume ava tichidzivirira asi mhene chaidzo hadzidi kushandisa condom – vanoda pasina dziviriro.

“Ungadii kana murume akuburitsira US$20 achiti haadi condom? Ndinotongotora mari nekuti ndiyo yandakainga kuno. Basa redu rine tsekwende dzakawanda iri.”

Nono – uyo akaita mwana mumwechete paainge akaroorwa – anoti vanotova nenzvimbo dzavanoziva uko vanoenda vachinotorwa nevarume.

“Makwikwi ariko ikoko uye kana takamira pa‘touch line’ unotofanirwa kuita zvinoita kuti ukwezve varume kuti utorwe. Sesu vechidiki, ndinoziva kuti ukangogeza bedzi murume haumushaye – kana venguva pfupi vanobhadhara US$5.

“Tinotoshandisawo mishonga yatinopihwa kun’anga nekumaporofita kuti tiite raki. Unotoudza muporofita kuti ndishandirei ndinoita zvekutengesa muviri obva akupa muteuro wekuti uonekwe nemhene.

“Kana usingade zvemishonga iyoyo unongoshandisa weti yako pakugeza, sauti yemagodo kana bute – zvinotibatsira. Weti inodzinga munyama,” anodaro musikana wechidiki uyu.
Anoti vane dzimba dzavanoroja US$3 pamunhu pazuva idzo dzakakamurwa nemachira emaketeni.
Muimba imwechete munogona kunge muine vakadzi vanosvika 20 nezvikomba.

Anoti zvimwe zvezvikomba zvavo zvinogona kugumisira zvovarwisa kana zvisingade kubhadhara.
Kana ari kwavanomira, Nono anozviti mu “student” paimwe yunivhesiti yeko.
“Ndinoitira kuti varume vandimhanyire. KuBulawayo kwandinobva havazive kuti ndizvo zvandiri kuita.”

Nono anoti iye zvino akawana murume ari “serious” anoda hake kuroorwa.
Achitaurawo, Sisi Madhudhu – uyo anova sachigaro wechikwata ichi anoti anotengesera muviri kuChipadze.
“Tinomira pa‘touch line’ ikoko nekuti kune makorokoza. Vamwe vacho vanototitorera mari dzedu kana kutirova asi zvino zvava nani nekuti hakusisina maShurugwi – ndiwo ainyanya kutishungurudza.
“Tinenge tiri muimba imwe chete yakakamurwa nemachira. munhu ane pake paanobhadharira mari uye zviri kuitwa nemumwe hazvina kana basa.
“Ini ndine makore 45 ekuberekwa asi ndine makore 15 ndiri mubasa iri. Tinokwikwidzana nevechidiki asi isu vechikuru tava kuziva maitirwo ebasa redu,” anodaro Sister Madhudhu.
Madhudhu anoti vanotya zvirwere zvepabonde asi havana zvekuita sezvo vachida kurarama.
“Kana ari murume akakwana anoziva kukosha kwemakodhomu, asi mumwe anoriramba condom iroro achiti anondipa mari yakawanda. Ndinongoguma ndabvuma,” vanodaro amai vevana vaviri ava.
Anoti vana vake nehama dziri kumusha kwake kuChiweshe havazive kuti anotengesa muviri, asi kuti anotengesa pamusika weko.
Sasachigaro, Madhudhu anoti vanotambira zvakanaka vamwe vanobva kumamwe matunhu vachizoita basa iri.
Madhudhu anoti haasi kutarisira kuenda kumudyandigere webasa rake nekukasika.

“Handisi kuzosiya basa nekukasika. Hamheno kana vana vangu vazokura,” anodaro achibvuma kuti anombobatwa nezvirwere zvepabonde “pamwe kana condom rikaputika”.
“Unotozvinzwa kuti mudumbu mune zvaitika.”

Votaura pamusoro pemashandiro evakadzi ava, VaMaxwell Hombiro vesangano reSasa vanoti, “Isu sesangano, tinogamuchira kuti vasikana ava vari kuita basa ravo. Takabatana neNAC, tinobatsira vasikana ava pakutengesa bonde.

“Takatozvibvuma kuti kutengesa bonde kuriko uye chakakosha kudzidzisa vasikana ava kuti vaite bonde rakadzivirirwa kuitira kuchengetedza varume vavanosangana navo zvose nemadzimai avo ari kudzimba.”

Vanoti chinangwa chavo ndechekuchengetedza utano hwevasikana ava zvose nevavanosangana navo.
“Ava ibasa ravo rekutengesa muviri, saka tinotovakurudzira kuti pavanoita zvepabonde vazvidzivirire kuitira kuti ivo vasabatwe nehutachiona,” vanodaro VaHombiro.

VaHombiro 

“Tinotoshandisawo mishonga yatinopihwa kun’anga nekumaporofita kuti tiite rakiw0. Unotoudza muporofita kuti ndishandirei ndinoita zvekutengesa muviri obva akupa muteuro wekuti uonekwe nemhene.

Share This:

Sponsored Links

We value your opinion! Take a moment to complete our survey