Kwayedza
Kingstone Mapupu
VARUME vaviri vanoshandira imwe kambani yekuGweru vanonzi vakabirwa US$1 510 uye mumwe wavo ndokubaiwa nebanga nemakororo apo vaifamba vachibva kumaindasitiri ekuMkoba vaine vamwe vashandi vachida kunopa mari iyi kumuridzi wekambani yavo.
Mutauriri wemapurisa kudunhu reMidlands, Inspector Emmanuel Mahoko, vanoti nyaya iyi yakaitika mumusha weClifton Park, kuGweru.
Vanoti vashandi vaviri vechirume vanova vamhan’ari, avo vose vane makore 55 ekuberekwa, vaiva nevamwe vashandi vachifamba netsoka vachibva kumaindasitiri ekuMkoba 12 kuGweru vaine U$1 510 iyo vaida kunogashidza kumuridzi wekambani yavanoshandira uyo aiva muguta reGweru.
“Apo vaifamba nemugwagwa wegiravhuru padyo nemusha weClifton Park, varume vaviri vasina kuzivikanwa, vanonzi vakangoerekana vabudikira pavaiva ndokutanga kupomera murume aiva mukuru kune vamwe vose vaivepo kuti aiva avabira nhare yavo. Panguva iyoyo, pakaita kukakavadzana apo aipomerwa kuba nevamwe vake akatanga kutiza uye vaimupomera ava vakatangawo kuvadzingirira ndokunobata mumwe mumhan’ari wemakore 55,” vanodaro Insp Mahoko.
Vanoti mumwe wemakororo aya akazoburitsa banga ndokuvhundutsira murume uyu achimuti aifanirwa kuburitsa zvinhu zvose zvaaiva nazvo muhomwe dzake nezvimwe omupa.
“Gororo iri rakazobvutira mumhan’ari uyu bhachi reworksuit yeblue raaiva naro maiva neUS$1 510 nenhare yerudzi rweItel achibva azomubaya nebanga kamwe chete pabendekete rekuruboshwe ndokuzomurova kaviri nebhutsu pambabvu dzekuruboshwe, murume uyu achibva atiza,” vanodaro Insp Mahoko.
Nyaya iyi yakazomhan’arwa kumapurisa epakamba yekuMtapa ichibva yatanga kuferefetwa uye kusvika pari zvino hapana munhu asungwa.
“Mumhan’ari akadziuka ronda rekubaiwa nebanga pabendekete rekurudyi akabva atakurwa kuendeswa kuchipatara cheGweru kunorapwa uye upenyu hwake huri parinani,” vanodaro Insp Mahoko.
Vanoti zvose zvakabiwa zvinokosha US$1 525.
“Tinokurudzira veruzhinji vangangodaro vaine ruzivo nekuda kwenyaya iyi kuti vabatsire nemashoko anoita kuti varume vari kupomerwa mhosva yekuba iyi nekuedza kuponda vakwanise kusungwa kuti vaende pakamba yemapurisa iri padyo navo. Tinokurudzira veruzhinji kuti vasiyane netsika yekutakura mari yakawanda pavari kana kuchengeta mudzimba dzavo,” vanodaro Insp Mahoko.
