Abel Ndooka
VATAMBI vechidiki venhabvu vokurudzirwa kusiyana nekutora zvinodhaka sezvo tsika iyi iri kukanganisa remangwana revakawanda vavo.
Kurudziro iyi yakaitwa naPaul Matsuku, uyo akaronga mutambo wenhabvu wevechidiki weCoach Stan Give Back to The Community Football Tournament wakatambirwa pachikoro cheKokora Primary School kuChiweshe svondo radarika. Mutambo uyu wakaona zvikoro zvinoti Kokora Primary, Kanyemba Primary, Bell Rock Primary neSt Albans Primary zvichikwikwidza.
Matsuku anoti zvinodhaka zviri kukanganisa remangwana revechidiki vakawanda naizvozvo vatambi venhabvu vanofanirwa kusiyana nekatsika aka.
“Ndinoda kupa yambiro kwamuri vechidiki, siyai kutora zvinodhaka nekuti hazvina hupenyu.
“Mukanzwa panonzi pari kutorwa zvinodhaka imi tizai nekuti zvinongokanganisa hupenyu hwenyu chete.
“Tinoda kuona remangwana renyu rakajeka, muchitamba nhabvu nekunotambira kunyika dzekuEurope nekuSouth Africa.
Asi kana mukatanga kutora zvinodhaka, zvese izvi zvinoenda mudondo,” anodaro Matsuku.
Zvakadaro, mutambo weCoach Stan Give Back to the Community Football Tournament wakahwinwa nechikoro cheKanyemba icho chakapedza chiri pamusoro mushure mekuwana zvibodzwa zvinomwe kubva pamitambo yese.
Sezvo paive nezvikwata zvina, mitambo yakatambwa iri yeroundrobbin, kureva kuti zvikwata zvese zvakatamba uye chakazowana zvibodzwa zvakawanda kudarika zvimwe ndicho chakahwina mutambo uyu.
Kanyemba yakakunda Kakora Primary 1-0, ndokukunda Bell rock 1-0 nekuzoita mangange 0-0 neSt Albans ndokubva yapedza iri pamusoro ikawana mukombe, menduru dzegoridhe nemayunifomu matsva.
Menduru dzesirivha dzakaenda neKakora Primary iyo yakapedza iri pechipiri.
Zvakadaro, vatambi 18 vakasarudzwa kupinda muchikwata cheSelect icho chichatenderera nenyika yese chichitamba nezvikwata zvakasiyana.
