Kwayedza
Lumbidzani Dima
VARUME vekuLupane vari kukurudzira kuti mishonga yechivanhu yekusimbisa musana sevhuka-vhuka imborambidzwa kushandiswa sezvo vachiti iri kutowedzera kupararira kwehutachiona hutsva hweHIV.
Zimbabwe, kuburikidza nesangano reNational Aids Council (NAC), iri mushishi kurwisa kuti ipedze dambudziko rekupararira kwehutachiona hutsva hweHIV panozosvika gore ra2030.
Mushure mekuona kuti vanhurume vari kusarira kumashure panyaya dzeutano – kusanganisira HIV – NAC yakavamba chirongwa cheBrother-to-Brother chekudyidzana nevarume panyaya dzine chekuita neHIV.
Pamusangano weBrother-to-Brother wakaitwa mudunhu raNdamuleni, kuLupane nguva pfupi yadarika, zvakabuda kuti pane dzimwe tsika dzechivanhu dzekushandisa mishonga yevhuka-vhuka (imbiza/isgubhu) dziri kukonzera matambudziko maringe nenyaya dzebonde.
Sadunhu Ndamuleni, VaPhilani Ncube, vanoti mishonga yevhuka-vhuka inowedzera simba remurume pabonde asi varume vemazuva ano havanzwisise kuti sei yaishandiswa kare.
“Isgubhu (vhuka-vhuka) inoita kuti murume aonekwe mubhedhurumu, zvinotoita kuti agare achinzwa kuti murume akakwana.
“Varume vemazuva ano havanzwisise kuti isgubhu yaishandiswa nemadzitateguru edu nekuti vaiva nevakadzi vakawanda vavaifanira kugutsa.
“Vanongonwa ivo vaine mukadzi mumwe chete zvoita kuti vapedzisire vave kusangana nevakadzi vakawanda vekunze.
“Naizvozvo kupararira kwehutachiona hweHIV kunowanda,” vanodaro VaNcube.
VaMdibhisi Dube vanoti vamwe vanhurume vanotokurudzirana kunwa vhuka-vhuka.
“Vamwe varume vanofuririka nyore, saka munhu akangonzwa kuti shamwari yake iri kushandisa isgubhu uye riri kumushandira, anobva atodawo kuzviedza,” vanodaro.
VaDube vanoti chimwe chinoita kuti varume vashandise vhuka-vhuka kuda kuvharidzira kubiridzira kwavanoita apo vanosasana nevamwe vanhukadzi kunze kuitira kuti madzimai avo asavafungire kuti pane zvavari kuita.
“Pandinosasana nevamwe vakadzi ndisingadi kuti mudzimai wangu azvizive, ndinonwa isgubhu.
“Kana ndangoinwa, ndinoita simba rakawanda.
“Neisgubhu, unge wava nesimba rakawandisa izvo zvinoita kuti hutachiona hweHIV hurambe huchipararira,” vanodaro.
VaIgnitious Sibanda vanoti kushandisa vhuka-vhuka kunogona kukanganisa mashandiro epfungwa dzemunhu.
“Zvinhu izvi zvinowanzoita kuti mahomoni (hormone) ane chekuita nebonde akunde simba rekufunga kwemumwe munhu uye mukana wekuti munhu afunge nezvekudzivirira pabonde mushoma.
“Zvauraya vamwe nekuti murume anoshandisa imbiza haana kuchengetedzwa kubva kuhutachiona hweHIV,” vanodaro.
Sabhuku Siqalekiso Sibanda vanoti mishonga iyi inofanirwa kurambidzwa kana nyika ichida kuzadzisa zvinangwa zvayo zvakadai sekukunda muhondo yekurwisa kupararira kwehutachiona hweHIV.
“Isgubhu ngaingorambidzwa kana kuti pave nekuedza kudzidzisa vanhu nezvazvo.
“Ikoko hakuna mwero unopimwa uye varume vanoinwa kusvika vanzwa seyave kushanda asi vanenge vanwa yakawandisa,” vanodaro.
