Kwayedza
Kingstone Mapupu
DAMBUDZIKO rekubiwa kwemombe munyika rinonzi radzosera kumashure mabasa ekurima sezvo vamwe varimi vasisina chekurimisa muminda yavo.
Mashoko aya akataurwa naMambo Ngezi, VaPeter Pasipamire, vekuMhondoro avo vanova zvakare senator kudunhu reMashonaland West vachiti mbavha dzarura nekuba zvipfuyo.
“Dambudziko rekubiwa kwemombe ranyanya izvo zvakonzera kuti vamwe varimi vatadze kufambira mberi nemabasa avo zvakanaka. Fungai kuti tine varimi vakagariswa patsva senzira yekuti munyika muve nemaguta, matura azare, asi mombe dzavo dzapera kubiwa.
“Kuno tiri kushanda takabatana nemapurisa kuti dambudziko iri ripere,” vanodaro Mambo Ngezi.
Vanoti sedunhu ravo reMashonaland West, kubiwa kwemombe kwanyanya nekudaro vari kuita misangano nemapurisa, masabhuku nemadzishe nechinangwa chekupedza dambudziko iri.
“Sehutungamiri mudunhu rino reMashonaland West, tiri kuita misangano semadzishe, makanzura, masabhuku nevamwe vatungamiri takanangana nedambudziko rekubiwa kwemombe. Tinotenda mapurisa vari kushanda nesu sezvo dzimwe mbavha idzi dziri kusungwa dzichipihwa zvirango kumatare edzimhosva.
“Asi tinokumbira kuti mutongo wembavha dzemombe ukwidzwe kusvika kana kumakore makumi maviri pachipfuyo,” vanodaro.
Mambo Ngezi vanoyambirawo vanamuzvinabhizimisi vemabhucha kuti vatenge mombe dzine matsamba akakwana uye anotsigirwa nemapurisa.
“Tine vemabhucha avo tiri kushanda navo tichivapa chenjedzo yekuti vasatengeserwe mombe dzekuba asi kuti voita basa ravo zvakachena. Tiri kuvashevedza kumatare kwedu paine mapurisa tichivadzidzisa kukosha kwemombe nezvimwe zvipfuyo.
“Pamusoro pezvo, tiri kushanda nemakanzuru nevebazi reVeterinary Services kuti kuonekwe kuti vemabhucha vari kushanda zviri pamutemo here. Tinovimba kuti nenzira iyi tinokwanisa kuvhara mwena iri kubiwa nayo mombe.”
Mambo Ngezi vanoti mombe dzose dzinofanirwa kutengeswa muridzi wechipfuyo aine chitupa uye aripo nemapurisa zvekare paine makadhi ekudhibhi.
“Mumataundishipi ose tine masachigaro ari kusarudzwa naivo vemabhizimisi avo vanocherechedza kuuraiwa kwemombe nezvimwe zvipfuyo kuti paonekwe kuti hazvina kubiwa here.”
Vanotizve kunze kwekurimiswa, pachivanhu mombe dzakakosha zvikuru sezvo dzichishandiswa pakuroora nekuripa mhosva dzakasiyana.
VaFarai Mhariwa (46) vanova mumwe wevanamuzvinhabhizimisi vane mabhucha kuMhondoro, vanotenda chirongwa chekurwisa kubiwa kwemombe mudunhu ravo.
“Tiri kutevedza zvose zviri kukurudzirwa nasenator wedu Mambo Ngezi izvo zvinodzikisa kubiwa kwemombe mudunhu redu. Chionai dzimwe mombe dzakapera kufa nezvirwere tikasara neshoma, saka hazvigone kuti shoma dzakasara idzodzo dzibiwe takatarisa, zvinodzosera kumashure mabasa ekurima.
“Seni ndine bhuku pabhucha pangu rinonyorwa munhu wose anenge anditengesera mombe, musha waanobva, nhamba dzake dzenhare nedzechitupa uye zvinoitwa mapurisa nevebazi reVeterinary Services vose varipo,” vanodaro VaMhariwa.
