Abel Ndooka
CHIKWATA checricket chemaChevrons chakabudirira kufambira mberi murwendo rwekurwira kuenda kumutambo weICC Men’s T20 World Cup zvichitevera kuhwina kwachakaita mitambo yeSub-regional qualifier iyo yaitambirwa kuKenya masvondo adarika.
MaChevrons akahwina mitambo yawo yese iri mishanu izvo zvakaona achikunda Kenya, Rwanda, Seychelles, Gambia neMozambique.
Kuhwina kwaakaita uku kwave kuona chikwata ichi, icho chinorairidzwa naJustin Sammons, chichifambira mberi kuenda kumutambo weRegional qualifiers uko chichanosangana neKenya zvekare, Uganda, Nambia nezvimwe zvikwata zvina zvichabva kune mamwe mapoka aitambawo mitambo yemaSub-regional qualifiers.
Zvimwe zvikwata zvichazotamba pamutambo uyu zvinoti Malawi neTanzania uye kwasara zviviri izvo zvichabva muboka rimwe reSub-regional qualifier Group C apo mitambo yacho ichazotambwa munaMbudzi.
Kumutambo weRegional qualifiers, zvikwata zviviri zvichapedza zviri pamusoro ndizvo zvichazofambira mberi kuenda kuICC Men’s T20 World Cup 2026 iyo ichatambirwa kuSri Lanka.
MuAfrica, munofanirwa kubva zvikwata zvitatu zvichaenda kuSri Lanka uye parizvino South Africa yakatobudirira kare kuenda kumutambo uyu.
Parizvino kwamirirwa kuona zvimwe zvikwata zviviri izvo zvichazotevera maProteas eSouth Africa kuenda kumakwishu aya.
