Abel Ndooka
SANGANO reZimbabwe Cricket (ZC) rinoti mitambo yechikwata yeZimbabwe Emerging Side yakakosha zvakanyanya sezvo ichibatsira kubika vatambi vemangwana avo vachazotambira maChevrons.
Masvondo adarika, chikwata cheZim Emerging Side chakatamba necheSouth Africa mumitambo miviri yeTest Match nemitatu yeOne Day International.
Pakasangana zvikwata izvi, vatambi vanosanganisira Antum Naqvi, Nick Welch, Emmanuel Bawa naBrendon Mavuta vakatamba zvinonwisa mvura.
Muhurukuro neKwayedza, mutauriri weZimbabwe Cricket — Darlington Majonga — anoti donzvo ravo kubika vatambi vachazotambira chikwata chenyika mune remangwana.
“SeZimbabwe Cricket, chimwe chinangwa chedu mune remangwana ndechekuti chikwata chemaChevrons chive nevatambi vakawanda vepamusoro saka kuti zviitike tinofanirwa kurongera zvikwata zvevechidiki zvedu mitambo yakawanda yekuti vatambe.
“Izvi zvinobatsira varairidzi vechikwata ichi pamwechete nevanosarudza vatambi nekuvapa mukana wekuona vatambi vakawanda vachitamba basa ravo roita nyore,” anodaro.
Majonga anoti ZC ine chibvumirano chayakaita nesangano rinoona nezvecricket kunyika yeSouth Africa chekuti pagore zvikwata zvavo zviri kusimukira zvigopota zvichitamba zvose.
“Isu neSouth Africa tine chibvumirano chatinacho icho chiri kuona zvikwata zvedu zviri kusimukira, zvingave zvevarume kana zvemadzimai, zvichitamba pagore rega-rega. Izvi zviri kubatsira chaizvo kupa vatambi vedu vari kusimukira mukana wekugadzira mazita avo mumutambo uyu,” anodaro Majonga.
Zvakadaro, mitambo yakatambwa neZim Emerging Side neSouth Africa, yakaona chikwata cheSouth Africa chichihwina mutambo uyu. Pamutambo weTest Match wekutanga, South Africa yakahwina uye wechipiri ndokuzopera uri mangange, kuchiti yeODI South Africa yakahwina 2-1.
