Kwayedza
Abel Ndooka
MUTAMBI wemaWarriors, Jordan Zemura, akatambira chikwata chake cheAFC Bournemouth svondo richangodarika apo chakabva kumashure ndokukunda cheNottingham Forest 3-2.
Zemura akatanga arimo mumutambo uyu asi akazoburitswa pakapera chikamu chekutanga chemutambo uyu, apo vainge vakakundwa 2-0. Muchikamu chechipiri (second half), Bournemouth yakaburitsa Zemura ndokupinza Ryan Fredericks ndokurwa kusvika vahwina 3-2.
Uyu wange uri mutambo wechipiri watambwa neBournemouth zvichitevera kudzingwa basa kwakaitwa Scott Parker svondo radarika mushure mekunge chadashurwa 9-0 neLiverpool.
Mumutambo wekutanga wakatambwa neBournemouth Parker adzingwa, yakaita mangange 0-0 neWolverhampton Wanderers uye mutambo uyu, Zemura akatamba maminitsi 69 akazotsiviwa zvekare naFredericks.
Tichitarisa vamwe vatambi vemaWarriors vakatamba svondo radarika kuzvikwata zvavo kuEurope, muEngland Division One Brendan Galloway akatambira chikwata chake chePlymouth Argyle apo chakakunda cheDerby County 3-2.
Kuchitiwo muchinda Marshall Munetsi akatamba mutambo wose apo chikwata chake cheStade deReims chakaita mangange 1-1 necheLens mumutambo weLigue 1 kuFrance.
