Abel Ndooka
SANGANO rinotungamira nhabvu muno reZimbabwe Football Association (ZIFA), nhasi ragadza chizvarwa chekuGerman – Michael Nees – kuve murairidzi mutsva wechikwata chenyika chemaWarriors.
Nees – uyo akamborairidza nyika dzinosanganisira Seychelles, Rwanda, Israel Under-21 neKosovo U-21 – apihwa basa rekutungamira maWarriors apo ari kurwira kuenda kumutambo weAFCON 2025 neFIFA 2026 World Cup.
Sachigaro wekomiti yeZIFA Normalisation Committee – Lincoln Mutasa – anoti kugadzwa kwaNees kunotarisirwa kusimudzira zvakanyanya nhabvu yemaWarriors.
“ZIFA ine chivimbo chikuru kuti kugadzwa kwaMichael Nees kuchasimudzira maWarriors. Ruzivo rwaanaro pamwe chete nehunyanzvi hwake pakurairidza nhabvu, zvamuita munhu chaiye akakodzera kutungamira chikwata chedu kuenda mberi,” anodaro Mutasa.
Kugadzwa kwaNees kunotevera nguva refu apo ZIFA yange ichingodzungaira ichishandura varairidzi izvo zvakaona ichimbogadza Brito, Norman Mapeza naJairos Tapera avo vange vachingorairidza chikwata chenyika ichi kwenguva diki.
