Kwayedza
Abel Ndooka
SANGANO rinotungamirira nhabvu reZimbabwe Football Association (Zifa) rinoti riri kushanda siku nesikati kuti nhabvu ichidzoswe kutanga kwemwedzi unotevera (Kubvumbi) zvichitevera kunyevenutswa kwakaitwa matanho ekurwisa kupararira kwechirwere cheCovid-19 neHurumende svondo rino.
Muhurukuro, mutungamiri weZifa — Felton Kamambo — anoti sangano ravo rakatotanga kare gadziriro dzekudzosa mutambo uyu izvo zvange zvichivaona vachiongorora nhandare dzose dzenhabvu dziri munyika.
Anoti chasara pari zvino kuti vachipihwa mvumo neSports and Recreation Commission (SRC) yekuti nhabvu ichitanga kutambwa.
“Isu takatotanga kare gadziriro dzekuti mutambo uyu udzoswe nekuongorora nhandare dzose dzenhabvu dziri munyika. Tichiri kuenderera mberi nekuongorora kuti nhandare dzedu dziri munyika dzakamira sei kuitira kuti tigare takagadzirira.
“Saka iye zvino takamirira kupihwa mvumo neSRC kuti tichitange kuronga mitambo ichitambwe,” anodaro Kamambo.
Anoti seZifa, vakanga vaine chivimbo chekuti nhabvu itange muna Kurume asi hazvichakwanisike saka vave kutarisira kuna Kubvumbi.
“Taida chaizvo kuti nhabvu itange mwedzi uno asi hazvichakwanisike, tave kutarisira mwedzi unotevera. Takamirira kunzwa kubva kuSRC kuti toita sei.
“Tiri kupedzisa gadziriro dzose kuitira kuti tikapihwa mvumo yekuti nhabvu ichitanga pasawanikwe chikoneso chinoita kuti isatambwe,” anodaro.
Kamambo anoti sangano ravo rakaudza hutungamiri hwemaligi ose ari muno anosanganisira Premier Soccer League, Division One neTwo kuti vavanyorere vachivazisa zvikwata zvichakwanisa kukwikwidza mumwaka wegore rino.
“Takati kumaligi ose ngavatizivise zvikwata zvichange zvichikwikwidza kuitira kuti patinotanga kuronga mafambiro anoita mitambo yegore rino tinge tichiziva kuti pachange pane zvikwata zvipi uye kuti zvitiitire nyore pakuita hurongwa hwacho,” anodaro Kamambo.
Kutanga mwaka wegore rino kana nhabvu ikatanga kutambwa, Kamambo anoti Zifa ndiyo ichange yave kubhadhara varidzi vepembe izvo zvakasiyana nezvaiitwa kare sezvo vaibhadharwa nezvikwata zvinenge zvichitamba.
“Gore rino tinoda kuti zvikwata zvisanyanyoremerwa saka isu seZifa takazvipira kubhadhara varidzi vepembe kutanga mwaka uno, zvikwata hazvichabhadhare zvega varidzi vepembe,” anodaro Kamambo.
