Muchaneta Chimuka
KAMBANI huru munyaya dzezvenhau munyika muno yeZimpapers ichakotsvera chirongwa cheZimpapers Cancer Power Walk nomusi weMugovera uno apo vanhu vachamhanya, kufamba nekuchovha mabhasikoro kunzvimbo dziri kumativi mana enyika uye mari ichaunganidzwa ichashandiswa mukubatsira varwere vegomarara.
Chirongwa ichi chichaitwa kunzvimbo dzinosanganisira muguta reHarare, Bulawayo, Gweru neMutare.
Muguta reHarare, veruzhinji vachafamba uye kuchovha mabhasikoro vakananga kuOld Hararians Sports Club uko kunozoitwa zvimwe zvirongwa zvese zvechenjedzo maringe nedenda iri iro rashungurudza nyika nepasi rose.
Mukushi wemashoko kuZimpapers, Mai Pauline Matanda, vanoti gadziriro dzechirongwa ichi dzasvika kwamvura yacheka makumbo.
Vanoti muguta reHarare, veruzhinji nevatsigiri vakasununguka kuenda pamahofisi eZimpapers ari paHerald House, panosangana mugwagwa Sam Nujoma naGeorge Silundika, vachitenga maT-shirts nemakepisi zvinoita US$10 kuti vakwanise kuzopinda mumutambo uyu.
“Tichange tichiita chirongwa ichi munzvimbo dzese dzine mizinda yedu. Tinokurudzira veruzhinji kuti vauye nehuwandu hwavo kuti vazotsigira chirongwa ichi sezvinofambirana nedingindira redu regore rino tinoti: ‘Famba, Mhanya, chovha bhasikoro nechinagwa chekurwisa gomarara.’ Kureva kuti nyaya iyi inoda mukomberanwa. Tinotenda vatsigiri vese vakaita kuti chirongwa ichi chibudirire. KuBulawayo, vanhu vachitenga maT-shirts avo pamuzinda wedu weThe Chronicle, kwaMutare paThe Manica Post kuchiti kuChinhoyi mudunhu reMashonaland West paPlatinum FM,” vanodaro.
Mai Matanda vanoti vanotenda zvakanyanya makambani nemapoka akasiyana ari kutsigira zvirongwa zveZimpapers Cancer Power Walk kubvira makore adarika akadai seNedbank, FBC Bank, City of Mutare, Sunny Yi Feng, Romapix, Lobels, Sir Charles, AWS Global, Harare Oncology, Zororo, ZRP, Moovah, St Giles, Minerva neHybrid Travel.
