Abel Ndooka
SANGANO reZimbabwe Cricket rakadoma zvikwata zviviri zvemaChevrons izvo zvichasangana nePakistan mumitambo yeOne Day International neTwenty20 International Series kuQueens Sports Club, kuBulawayo munguva pfupi inotevera.
MaChevrons nePakistan zvichasangana mumitambo inoti mitatu yeODI nemimwe mitatu zvekare yeT20.
Mitambo ichatanga kutambwa ndeyeODI mumazuva anoti 24, 26 na28 Mbudzi kuchiti yeT20 ichatambwa musi wa1, 3 na5 Zvita.
Chikwata chemaChevrons chine musanganiswa wevatambi vagara vachitamba nevechidiki avo vakashevedzwa kuzotamba kekutanga.
Vatambi vanoti Trevor Gwandu, Tashinga Musekiwa naTinotenda Maposa vakashevedzwa kekutanga uye vachabatana nevamwe vane mukurumbira vanosanganisira Craig Ervine, Sikandar Raza, Sean Williams, Blessing Muzarabani naRichard Ngarava.
Convener of selectors kuZimbabwe Cricket – David Mutendera – munchinyorwa chakabva kuZC, anoti kuumbwa kwakaita chikwata ichi kunobatsira mukusimudzira tarenda revatambi.
“Mutambo uyo tichasangana nePakistan wakatikoshera seZimbabwe uye ndinovimba kuti chikwata cheODI chatasarudza chakatokwana chaizvo.
“Kuvepo kwevatambi vakaita saCraig, Sikandar naSean kunosimudzira kubatana muchikwata uye vatambi vechidiki vakadai saClive Madande, Brian Bennett naDion Myers nevatatu vasati vambotamba zvinobatsira mukusandura zvinhu mumitambo yakasiyana,” anodaro.
Kuchikwata cheT20, Zimbabwe yakadana vatambi vese avo vakatamba nguva pfupi yadarika kuICC Men’s T20 World Cup 2026 sub-regional qualifier iyo yakatambirwa kuKenya mwedzi wadarika.
Chikwata ichi chaitungamirirwa naSikandar Raza.
Mutendera anoti vakasarudza kuchengetedza chikwata ichi sezvachiri nechinangwa chekuti zvigochibatsira kuramba chichikunda mumitambo yacho.
“Takazviona zvakakosha kuramba tiine chikwata icho chakadadisa kuKenya.
“Kuramba tinacho zvinobatsira kuti chirambe chakabatana uye chichienda mberi izvo zvakachiona chichikunda nguva yadarika,” anodaro Mutendera.
Zvikwata zvemaChevrons
Zimbabwe ODI squad
Craig Ervine (captain), Faraz Akram, Brian Bennett, Joylord Gumbie, Trevor Gwandu, Clive Madande, Tinotenda Maposa, Tadiwanashe Marumani, Brandon Mavuta, Tashinga Musekiwa, Blessing Muzarabani, Dion Myers, Richard Ngarava, Sikandar Raza naSean Williams
Zimbabwe T20 squad
Sikandar Raza (captain), Faraz Akram, Brian Bennett, Ryan Burl, Trevor Gwandu, Clive Madande, Wessly Madhevere, Tinotenda Maposa, Tadiwanashe Marumani, Wellington Masakadza, Brandon Mavuta, Tashinga Musekiwa, Blessing Muzarabani, Dion Myers naRichard Ngarava
