Kwayedza
Muchaneta Chimuka
NYANZVI dzezveutano dzinokurudzira vanhu kuti vapote vachidya chikafu chakaita semutakura wenyimo uyo unonzi une zvose zvinovaka muviri uye uchigutsa.
Pamusoro pezvo, iyi imbuva yeparwendo uye tinowana iron nemacarbohydrates kubva munyimo.
Svondo rino Marian Mutukirwi anotsanangura mamwe mabikirwo emutakura uyu.
Zvinodiwa:
Chikari, nyimo dzakaomeswa, mvura nemunyu.
Mabikiro:
Tora chikari chakachena wodira komichi imwechete yenyimo.
Isa makomichi mashanu emvura wogadza pamoto.
Ita kuti moto unge uchipisa zviri pakati nepakati kuitira kuti dzisatsviririre.
Ramba uchiwedzera mvura kusvika dzaibva, wozoisa munyu wakaringana.
Wozodii?
Kana zvadai, chigadzirira kunakirwa nemutakura wenyimo.
Nyimo dzinogona kunwiswa svutugadzike, mahewu kana zvimwe zvinwiwa nekuti dzinodzipa kana ukadzidya dzakadaro.
Sunungukai kutumira zvamunoda kuti zvibude pachirongwa chino panhare dzinoti +263 713 411 281.
