Kwayedza
Kingstone Mapupu
VARIMI vari kuyambirwa kuti vangwarire zvirwere zvinogona kubata tsuro mumwaka weZhizha sezvo zvipfuyo izvi zvichinzi zvinobatwa nematenda akawanda munguva yekunaya kwemvura.
Yambiro iyi inopihwa nenyanzvi munyaya dzekupfuya tsuro, VaGift Jambaya (48), avo vanoita basa iri vari mumusha weWestgate, muguta reHarare.
“Senguva yekunaya kwemvura yasvika iyi, tsuro dzinobatwa nezvirwere zvakawanda izvo zvinoda kuti varimi vazive. Vanokurudzirwa kugara vachidzibaya majekiseni nekudzipa mimwe mishonga dzisati dzarwara. Zvirwere izvi zvakawanda asi zvinonyanya zvinosanganisira zvisasa, kufufutirwa, kutonhorwa nechekukura kwemazino epamberi,” vanodaro VaJambaya.
Vanoti vanoda kupfuya tsuro vanofanirwa kutanga vagadzira matanga kana kuti zvirugwi zvisingapinde mvura uyewo zvichigara zvichitsvairwa muchipinda mhepo.
“Tinoda kuti varimi vadyidzane nenyanzvi dzekuVeterinary Services zvipfuyo zvavo zvogara zvichirapwa. Sezvimwe zvipfuyo, zvirwere zvetsuro munguva yekunaya kwemvura zvinowanda. Tine chirwere chekukura kwemazino chatinoti overgrown teeth icho chinopedzwa nekudzipa kudya dzichitsenga kusvikira adzikira,” vanodaro.
Denda rekukura mazino iri vanoti rinokwanisa kupera roga kana kuti kuenda nadzo kumachiremba ezvemhuka.
Tsuro
Vanoti chimwe chirwere chinobata tsuro chinonzi masnaffles chinokonzera maziso kuzvimba achizara misodzi nemabori apo dzinohotsira dzichibuda dziwa.
“Mukangoona tsuro dzenyu dzave kuzvimba maziso achizara mvura uye dzichibuda dziwa nekuhotsira, kasikai kuenda nadzo kumachiremba. Tine chimwe chirwere zvakare chinodaidzwa kuti hairballs chinoita kuti mumuviri wetsuro mushaye mvura zvachose zvichiita kuti itadze kuzeya zvakanaka chinova chinouraya zvikuru,” vanodaro VaJambaya.
Pane chirwere chinoita kuti dziburitse weti ine ropa chinodaidzwa kuti urine tumors icho chinoda kuti varimi vagare vachidzipa mishonga yekuchidzivirira.
“Chirwere chinonyanya kunetsa tsuro munguva ino yeZhizha chinonzi myxomatosis chinoitawo kuti dzizare mvura mumaziso, mhuno nemiromo yonyorova nekuzvimba kusikarudzi kwadzo kuchibuda zvinhu zvichena. Denda iri rinotapukira kune dzimwe mhuka pamusha kuburikidza nekufambiswa nenhunzi, nhata nehumhutu.”
Chimwe chirwere chinonyanya kubata tsuro chinonzi calicivirus rabbit haemorrhagic chinoita kuti dzibude ropa nemumhuno nemukanwa uyewo nekuita weti netsvina ine ropa.
“Chirwere ichi chinoita kuti tsuro dzishaye simba dzofenda uyewo nekutonhorwa zvakanyanya chatinoti fever. Kana dzisina kubatsirwa, dzinofa mushure menguva inoita maawa ari pakati pe12 ne36. Dzinozvimbawo maziso nekuunduka mvere muviri wose,” vanodaro VaJambaya.
Chirwere chekufufutirwa kana kuti kuzvimbirwa vanoti chinouraya tsuro zvikuru uye chinokonzerwa nekudzipa makireshi kana chibage chakawanda nekumwewo kudya kusina kukodzera kuzvipfuyo izvi.
“Ipai tsuro kudya kunokurudzirwa nenyanzvi. Tine chimwe chirwere zvakare chinokonzera zvisasa kutsuro munzvimbo dzinosanganisira mumhuno, munzeve, mumiromo nemuviri wose izvo zvinokwanisa kurapika,” vanodaro VaJambaya.
