Kwayedza
Kingstone Mapupu
DZIMWE nyanzvi dzekuveza matombo dzinoti zvivezwa zvavo zvinoratidza mararamiro evanhu akasiyana, vangave vachifara kana kuti vakasuwa, uye vachinyanya kukoshesa tsika nemagariro evanhu vatema.
Kwayedza inoita hurukuro nevamwe vanoita basa rekuveza mumugwagwa weJoshua Nkomo Road uyo unoenda kunhandare huru yendege yeRobert Mugabe International Airport, muguta reHarare.
VaRobert Chikumbo (41) vanobva kuMagunje, kuHurungwe naVaWellington Chingondi (45) vanobva kwaChivero kuMhondoro, avo vanoveza matombo vari panzvimbo yeTsindi Zim Stone Sculpture mumugwagwa uyu, vanoti vari kurarama nemabasa emawoko aya.
Vanoti kunyangwe zvazvo zvivezwa zvavo zvisingataure, asi zvine mashoko azvinawo ayo anonzwisisika nevanozviona.
Wellington Chingondi kuruboshwe naRobert Chikumbo
Chimwe chezvivezwa zvavo chinoratidza mhepo nemafambiro ayo chavanoti chinomirira chamupupuri nemhando yemhepo inokonzera kunaya kwemvura.
VaChikumbo, avo vakatanga kuveza matombo mugore ra2000, vanoti vakaveza chivezwa ichi vakatarisa kukosha kwakaita mhepo mukurarama kwevanhu uyewo nezvainokonzera zvakaita sekuuya kwemvura munguva yeZhizha.
“Tine mhepo yechamupupuri neimwe yakasimba inotenderera ichipinda nepakasiyana zvinoratidzwa nechivezwa ichi. Ino inguva yekunge Zhizha rava kutanga saka kunosimuka mhepo yechamupupuri neimwe semucherechedzo unoratidzwa nechivezwa ichi,” vanodaro VaChikumbo.
Vanoti vane chivezwa cheshiri dzinonzi haya idzo dzinochemera kunaya kwemvura.
“Tine haya dzatakaveza dzichitsinhirana nekufamba kwemhepo nekuti haya kuzochema kwayo inenge ichinzwa mufambiro wemhepo nekudaro inochema yakatarisa mudenga nguva zhinji,” vanodaro VaChikumbo.
VaChingondi vanotiwo vakatanga kuveza mugore ra1996 uye zvavanoveza zvinoburitsa zvakasiyana mukurarama kwevanhu.
Vanoti vanonyanya kuveza madzimai anova anamambokadzi.
“Ndinonzwa kufara kana ndichiveza madzimai ari pahushe, vanamambokadzi kana kuti vanaqueen zvisinei kuti tine zvakawanda zvatinoveza,” vanodaro VaChingondi.
VaMunyaradzi Muhove (33) vanobva kuGuruve mumwe wavanobatsirana naye kuveza matombo vari panzvimbo imwe chete iyi.
VaTanyanyiwa Sakarombe (43) vekwaRusape, avo vanovezerawo matombo panzvimbo iyi, vakaveza Mambo Lobengula vachiratidza kutsamwa kukuru vaine pfumo netsvimbo yavo izvo zvavanoti zvinoratidza kutorerwa kwakaitwa vanhu vatema nyika nevachena.
“Mambo Lobengula vaiva vakatsamwa mushure mekupambwa kwenyika yavo nevachena. Chivezwa ichi mucherechedzo mukuru kuti zvakamboitwa izvi zvinogona kuda kuitwa zvakare nhasi uno nekuti vanyengeri havana kupera,” vanodaro VaSakarombe.
