Blessings Chidakwa —
VAGARI vekwaMambo Chireya, kuGokwe, svondo rapera vakasara vakabatira hana mumawoko zvichitevera nyaya inotyisa yemuzukuru anonzi akadzika sekuru vake demo mumusoro avo vakabva vangofa pakerepo mushure mekunge mbudzi dzavo dzadya mapfunde mumunda make.
Murava Simonga wemubhuku raUswahwengavi Masemo anonzi akatema sekuru vake, Jimmison Simonga, nedemo ndokubva vafira panzvimbo.
Mambo Chireya, VaHenry Chireya, vanotsinhira nyaya iyi vachiti Murava akatosungwa akaendeswa kukamba yemapurisa eZimbabwe Republic Police iri paGokwe Centre.
“Vaviri ava vanonzi vakanetsana mushure mekunge mbudzi dzaJimmison dzapinda mumunda waMurava dzikadya mapfunde aainge akakohwa izvo zvinova zvazokonzera mhirizhonga iyi,” vanodaro Mambo Chireya.
Vanoenderera mberi vachiti: “Murava anonzi akazotema mufi nedemo mumusoro akafira pakarepo, chitunha ndokuzoendeswa kumochari yechipatara cheGokwe.”
Mutauri wemapurisa kudunhu reMidlands, Assistant Inspector Ethel Mukwende, vanoti vanoda nguva yekutsvaga mafambiro akanyatsoita nyaya iyi.
“Handisati ndanzwa nezvenyaya iyi asi ndichabata vekukamba yakasunga munhu ari kupomerwa mhosva iyi ndonzwa zvizere,” vanodaro.