Kwayedza
Abel Ndooka
CHIKWATA chinotambirwa naMarshall Munetsi cheStade de Reims kuFrance nechaMunashe Garananga cheSheriff Tiraspol yekuMoldova ndizvo zvakahwina mitambo yazvo yesvondo rapera pazvikwata zvinotambirwa nevatambi vemaWarriors kuEurope.
Stade de Reims yakakunda Lorient 1-0 kunhandare yeStade Auguste-Delaune II, kuchiti Sheriff yakahwina 4-0 ichirakasha Dacia-Buicani.
Mumutambo uyu, Munetsi akatanga arimo ndokutamba maminitsi 66 akazotsiviwa naAmine Salama apo wakange uchiri 0-0.
Reims yakazonwisa mumanitsi 84 apo Joshua Darius Wilson-Esbrand akapinda mumutambo uyu watambwa manitsi 66 ndokubatsra chikwata chake kuhwina.
Mwaka uno kusvika pari zvino, Reims yatamba mitambo 10 uye Munetsi atamba yose ndokukwanisa kunwisa kaviri.
Reims yakagara pechishanu palogo rekuFrench Ligue 1 uye ikapedza iri pachinzvimbo ichi inowanisa mukana wekutamba mitambo yemuEurope mwaka unotevera.
Reims iri kuenda kunhandare yeStade de la Beaujoire uko ichanosangana neNantes nemusi weSvondo.
Kuchiti kuFrance kwekare, mutambo weOlympique Marseille neOlympique Lyon chikwata chinotambirwa naTino Kadewere hauna kubudirira kuzotambwa sezvo bhazi reLyon rakatemwa nevatsigiri veMarseille.
Izvi zvakaona murairidzi weLyon, Fabio Grosso, achikuvara mushure mekutemwa nedombo iro rakapwanya hwindo rebhazi ndokumucheka mumusoro.
Mwaka uno, Kadewere hausi kunyatsomufambira zvakanaka kuLyon sezvo iye pamwe chete nechikwata chese vari kutatarika.
Lyon ndiyo yakasenga iri pasi pelogo kuFrance sezvo yakwanisa kuwana zvibodzwa zvitatu kubva mumitambo mipfumbamwe.
Mumitambo yatambwa neLyon, Kadewere akwanisa kutamba mina chete uye haasati anwisa.
Garanganga ainge akagara pabhenji pakahwina chikwata chake 4-0.
Munashe Garananga
Svondo radarika zvekare, mutambi uyu akatamba mutambo weUEFA Europa League uyo chikwata chake chakaita mangange 1-1 neServette yekuSwitzerland.
Akatanga akagara pabhenji ndokuzopinzwa watambwa maminitsi 85.
KuEngland, chikwata chaMarvelous Nakamba cheLuton Town chakarikitwa 3-1 neAston Villa mumutambo wakatambirwa kuVilla Park.
Marvelous Nakamba
Nakamba akatanga arimo mumutambo uyu asi akazoburitswa watambwa maminitsi 76 apo Luton yainge yakatotungamirwa 3-0.
Luton yakazokwanisawo kudzora chibodzwa chimwe chete apo Emiliano Martinez mubati wepagedhi weAston Villa akanwisa mugedhi rake.
Nakamba mwaka uno akwanisa kutamba mitambo yese 10 yeLuton Town yeEngland Premier League.
Luton ichange iri pamusha payo nemusi weSvondo apo ichasangana neLiverpool.
KuItaly, Jordan Zemura akatamba maminitsi 62 apo chikwata chake cheUdinese Calcio chakaita mangange 1-1 neAC Monza.
Jordan Zemura
Kubva aenda kuUdinese achibva kuBournemouth yekuEngland, Zemura akwanisa kutambira Udinese mitambo mipfumbamwe kubva pa10 yatambwa nechikwata ichi mwaka uno yeItaly Serie A.
Kuchiti kuCyprus, chikwata chaTendayi Darikwa cheApollon chakabviswa pamusoro pelogo reCypriot First Division zvichitevera kurakashwa kwachakaitwa chiri pamusha payo 3-0 nePafos FC.
Darikwa atamba mitambo yose mipfumbamwe yechikwata ichi ndokunwisa kamwe chete kusvika pari zvino.
Tendayi Darikwa
Kukundwa kwakaita Apollon kwakabva kwabatsira APOEL Niconisa neAris Limassol kuti zviende pamusoro peApollon.
Apollon ichasangana neOmonoia Nicosia kunhandare yeGSP nemusi weMugovera.
