Kwayedza
Abel Ndooka
VAKOMANA vatsva vemuPremier Soccer League veBikita Minerals vanoti donzvo ravo guru kusimudzira nhabvu mupurovhinzi yeMasvingo zvichitevera kupinda kwavakaita muPSL mwaka uno.
Kupinda kwakaita chikwata ichi, icho chinozivikanwa zvekare nekunzi Lithium Boys, muPSL kwaona kuMasvingo kuchitambirwa nhabvu yeligi iri kekutanga mumakore 13 izvo zvakapedzisira kuitwa mugore ra2011 apo Masvingo United yaikwikwidza muPSL.
Lithium Boys yakagadza Saul Chaminuka pachigaro chinopisa uye murairidzi uyu ari kubata basa rinonwisa mvura.
Mumitambo mitanhatu yatambwa nechikwata ichi kusvika parizvino, chahwina miviri ndokuita mangange miviri nekukundwa kaviri zvekare. Pamitambo miviri yachahwina, chakakunda CAPS United 1-0, Bulawayo Chiefs 2-0 ndokuita mangange 2-2 neFC Platinum uye 1-1 neYadah Stars.
Lithium Boys yakakundwa 1-0 neDynamos FC uye 2-1 neArenel Movers. Muhurukuro neKwayedza, mutauriri weBikita Minerals – Collen Nikisi – anoti kudzoka kwenhabvu kuMasvingo chinhu chikuru kwavari sechikwata.
“Sechikwata, chinangwa chedu chikuru kusimudzira nhabvu muMasvingo nekupa mikana kune vechidiki vanobva munzvimbo dzakasiyana dzakatikomberedza.
“Tinoda chaizvo kurwisa kutorwa kwezvinodhaka kwadai kutekeshera kwese-kwese naizvozvo tine zvirongwa zvakawanda zvatiri kuita zvekuti vechidiki vange vachivaraidzwa vachitamba nhabvu vasambofunge zvekutora zvinodhaka.
“Zvikwata zvedu zviri kukwikwidza mumaligi akasiyana saka tine varairidzi uye vaongorori vevatambi vari kushanda basa guru rekuongorora vane matarenda kuti vagouya kuzotambira zvikwata zvedu.
“Masvingo musha wenhabvu, tine zvikoro zvakawanda zvine mukurumbira panhabvu saka tichaongorora vatambi ivavo tichivasimudzira,” anodaro Nikisi.
Anoti mumakore maviri kana matatu anotevera, shuviro yavo ndeyekuti vatambi venhabvu vanobva mupurovhinzi yeMasvingo vabve munzvimbo dzakaita seBikita, Gutu neZaka.
“Isu nepatiri kuenda paPamushana High tiri pedyo saka tinoda kuita chikoro ichi yatinoti School of Excellence apo tichadzidzisa nhabvu. Tichashanda nezvimwe zvikoro zvakaita seDewure neBikita Fashu tichidzidzisa nhabvu.
“Saka tine chivimbo chekuti vana vatichabika ndivo vachatimirira zvekare,” anodaro.
Kubva pakatanga mwaka wegore rino, Bikita Minerals yange ichinotambira kwaMutare nekuti nhandare yavo haisati yasvika padanho rinotenderwa kuti itambirwe mitambo yePSL. Nikisi anoti vari mushishi kumhanya kuvandudza nhandare yavo yekuBikita.
“Nhandare yedu ichiri kugadzirwa, shuviro yedu kuunza mitambo yePSL muBikita uye tinoziva chaizvo kuti vatsigiri vedu vakamirira kuona zvikwata zvakaita sanaDynamos, Highlanders FC nezvimwe zvichiuya kuzotambira muBikita.
“Naizvozvo tiri kushanda nesimba kuti nhandare yedu ivandudzwe isvike padanho repamusoro rinotenderwa kuti itambirwe mitambo yePSL,” anodaro Nikisi.
