Kwayedza
Abel Ndooka
ZVIKWATA zvenhabvu zvevechidiki 16 zvichatatsurana mumutambo weSeh Calaz Under-15 Soccer Birthday Celebration Tournament uyo uchatambirwa kuStodart, kuMbare nemusi weMugovera.
Mutambo uyu, uyo unorongwa pagore, ndewekupemberera zuva rakaberekwa muimbi weZim-dancehall – Tawanda Mumanyi – uyo vazhinji vanoziva saSeh Calaz uyo anobva munzvimbo yeMbare umo akakurira.
Seh Calaz akazvarwa nemusi wa2 Nyamuvhuvhu mugore ra1990.
Mumwe wevarongi vemutambo uyu – Stanley Kavayi – weReal Stars Mbare anoti Seh Calaz mucherechedzo wakanaka munzvimbo yeMbare.
Anoti muimbi uyu anodiwa zvikuru nevechidiki kuburikidza nemabasa aanoita ekuvasimudzira nekudaro vanoronga mutambo uyu nechinangwa chekupemberera zuva rekuzvarwa kwake.
Panotambwa mitambo iyi, Calaz anoshevedzwa ouya kuzoita muyenzi anoremekedzwa apo anoswera achiona mitambo iyi uye ozopihwa mukana wekutaura mashoko anovaka kune vatambi vechidiki.
“Makore ese isu muno muMbare tinoda kupemberera nyanzvi dzakaita mukurumbira mumabasa akasiyana kusanganisira Seh Calaz uyo watiri kupemberera svondo rino nemutambo wenhabvu uchange une zvikwata 16 zvichauya kuzotatsurana.
“Mutambo uyu uchange usiri wekungopemberera bhavhadhe raCalaz chete asi kuti tinenge tichisimudzira nhabvu mune vechidiki pamwe nekutora mukana wekutaura navo tichivadzidzisa kuti vasiye kutora zvinodhaka izvo zviri kuparadza hupenyu hwevechidiki vakawanda,” anodaro Kavayi.
Zvikwata zvichakwikwidza pamutambo uyu zvinosanganisira Real Stars Academy, All Stars Academy, Boss T Bhora, Mukamugo Academy, Tendai Strickers, Sporting Community Africa, Black Eagles Academy, One Touch Football Academy, Super Stars, Budiriro Stars, Younga Stars, AKA Stars, Mountain Academy, BM Athletic neDZ Academy.
