Kwayedza
Abel Ndooka
CHIKWATA checricket chemaLady Chevrons chiri kuIndia uko chiri kuita gadziriro chakatarisana nekuzonokwikwidza kuUnited Arab Emirates (UAE) munaGunyana murwendo rwekurwira kuenda kumutambo weInternational Cricket Council (ICC) Women T20 World Cup 2023.
Mutambo weICC Women T20 World Cup uchaitwa gore rinotevera uye mimwe mitambo yacho ichatambirwa kuSouth Africa. Mutambo wekuUAE uchange uine zvikwata zvisere zvinoti Zimbabwe, UAE, Bangladesh, Thailand, Scotland, Papua New Guinea, Ireland neUnited States of America izvo zvichazorwira matikiti maviri ekuenda kuSouth Africa.
Muchinyorwa chakabva kuZimbabwe Cricket (ZC), mukushi wemashoko wesangano iri – Darlington Majonga – anoti maLady Chevrons akaenda kuIndia uko akashevedzwa nesangano reOmtex ICWC Cricket Institute kunotamba mitambo yehushamwari. Mitambi iyi iri kushandiswa nemaLady Chevrons segadziriro dzekuzoenda kuUAE kunorwira tikiti rekuenda kuWorld Cup kuSouth Africa.
Majonga anoti ZC yakatumira chikwata chevatambi 16 kuIndia icho chiri kutungamirwa naMary-Anne Musonda.
“Chikwata chedu chiri kuIndia uko chichagara kwemazuva 18 uye chakashevedzwa neOmtex ICWC Cricket Institute kuti chizotamba mitambo yehushamwari nezvikwata zvakasiyana zvekuIndia.
“Mitambo iyi maLady Chevrons ari kuishandisa segadziriro dzavo dzekuzoenda kuUnited Arab Emirates uko achanokwikwidza mumutambo wekurwira kuenda kuICC Women’s T20 World Cup.
“KuIndia, mitambo yavo yese ichatambirwa kunhandare yeNICE Cricket Arena kuBengaluru,” anodaro Majonga.
Zvakadaro, chikwata chevarume chemaChevrons chakahwina tikiti rekuenda kuICC Men’s T20 World Cup iyo ichatambirwa kuAustralia munaGumiguru.
MaChevrons akabudirira kuenda kumutambo uyu pamwe chete neNetherlands iyo yakapedza iri pechipiri mumutambo wakatambirwa kuQueens Sports Club kuBulawayo.
KuWorld Cup, iyo ichatambirwa kuAustralia, maChevrons akaiswa muboka rine zvikwata zvinoti Ireland, Scotland neWest Indies.
