Kwayedza
Abel Ndooka
CHIKWATA chenyika checricket chemaChevrons chiri muhondo apo chiri kutatsurana nezvikwata zvipfumbamwe zvichirwira matikiti maviri asara ekuenda kumutambo weInternational Cricket Council World Cup uchatambirwa kuIndia kutanga munaGumiguru.
Mumitambo yekurwira matikiti miviri aya yeICC World Cup Qualifiers, iyo iri kutambirwa muno, maChevrons ari muGroup A uye akakunda Nepal mumutambo wekutanga ne8 wickets nemusi weSvondo wadarika.
Kuchiti neChipiri, akakunda Netherlands ne6 wickets mumutambo uyo Sikandar Razar akatamba zvinonwisa mvura izvo zvakamuona achihwiniswa mubairo wePlayer of the Match.
Mumutambo uyu, Raza akanyora nhoroondo yekuve mutambi wekutanga kuita 100 runs nekuchimbidza arova mabhora 54 uye akakwanisawo kutora 4 wickets apo maChevrons aibowler.
Mumitambo miviri iyi yatambwa nemaChevrons, vatambi vanoti Craige Irvine, Sean Williams, Wesley Madhevere naRichard Ngarava vange vachitamba zvinodadisa izvo zvakabatsira chikwata chavo kuhwinha.
Mutambo unotevera, maChevrons ane gomo guru rekukwira apo achasangana neWest Indies nemusi weMugovera.
Chikwata chenyika ichi chinofanirwa kuhwina zvekare kuti chigobudirira kuenda kuSuper Six yemutambo uyu.
MaChevrons anozopedzisira nekusangana neUnited States of America nemusi weMuvhuro svondo rinotevera.
Mumutambo wemaqualifiers uyu, muboka rimwe muchabuda zvikwata zvitatu zvichazoenderera mberi kuSuper Six zvonotatsurana kusvika pawanikwa zviviri zvinopedza zvine zvibodzwa zvakawanda izvo zvinobva zvabudirira kuenda kuWorld Cup yegore rino.
Zvikwata zvichabuda muboka rekutanga reGroup A zvichasangana nezvichabva kuGroup B.
