Kwayedza
Abel Ndooka
CHIKWATA checricket chemaChevrons chiri kuNamibia uko chiri kubandana nechekunyika iyi mumitambo mishanu yehushamwari yeT20 International Series.
MaChevrons ari kushandisa mutambo uyu kuita gadziriro dzekuzotamba mutambo weICC Men’s T20 World Cup Africa Qualifier wekurwira kuenda kuWorld Cup uyo uchazotambirwa kuNamibia kutanga nemusi wa20 Mbudzi.
Murairidzi wemaChevrons – Dave Houghton – akatakura vatambi 16 kuenda navo kuNamibia vanosanganisira Craig Ervine, Sean Williams, Sikandar Raza, Tendai Chatara, Nich Welch, Nyasha Mavavo naTinashe Kamunhukamwe avo vaachange achiongorora apo ari kuumba chikwata chake.
Muchinyorwa chakabva kuZimbabwe Cricket, Houghton anoti: “Mutambo uyu neNamibia wakakosha munzira mbiri, chekutanga aka kachange kari kekutanga tichitamba sechikwata kubva zvakakapedzisira kutamba mumitambo ye50-over World Cup Qualifiers saka tinofanirwa kutanga kuhwina zvekare.
“Chechipiri, muchikwata chedu hamuna akamboona kuti kuNamibia kunotambika zvakadini saka rwendo urwu rwuchavhura zvakawanda takatarisana nekuzotamba mutambo wemunaMbudzi.
“Shoko rangu riri pachena nderekuti handei tinohwina mitambo yese uye kubudirira kuenda kuWorld Cup zvichazongogadzirika zvega.
“Zvakakosha kuti tisangohwine chete, asi kuti tihwine zvine mutsindo mudunhu (region) medu,” anodaro Houghton.
Mutambo wekurwira kuenda kuWorld Cup uchange une zvikwata zvinoti Kenya, Nigeria, Nambia, Rwanda, Tanzania, Uganda neZimbabwe.
Zvikwata zviviri zvichapedza zvine zvibodzwa zvakawanda kudarika zvimwe ndizvo zvichabudirira kuenda kuICC Men’s World Cup iyo ichazotambirwa kuWest-Indies neUnited States of America gore rinotevera.
