Kwayedza
Mashudu Mambo
VARUME vaviri vanoshanda sevarindi vamiswa pamberi pedare nemhosva yekuba maheu anokosha US$5,50 pakambani yeHoney Pot Maheu iri kuBulawayo.
Mutongi wedare reBulawayo Magistrate Courts – VaBusani Sibanda – vapa vaviri ava, Approval Mapfumo (20) naNqobizitha Dube (21), chirango chekugara mujeri kwemwedzi mitanhatu.
Mwedzi mitatu yazosendekwa parutivi nechitsidzo chekuti vabhadhare faindi ye$20 000 pamumwe nemumwe wavo. Mimwe mwedzi mitatu yange yasara yasendekwazve parutivi nechitsidzo chekuti havazopara mhosva yakadai mumakore mashanu anotevera.
Vachibvunzwa kuti sei vakaba maheu aya, vaviri ava vanoti vaida kuzoatengesa. Dare raudzwa kuti musi wa23 Nyamavhuvhu gore rino, pakambani yeHoney Pot Maheu nenguva dza3 mambakwedza, vaviri ava vakaba 15 x 700ml dzemaheu.
Maheu aya anokosha US$5,50 uye ose akawanikwa.
