Kwayedza
ACHANGE ari makuwerere svondo rino neChishanu pachikoro cheRakodzi Secondary School kuMarondera kudunhu reMashonaland East apo pachange pachiparurwa mutambo weNash Stellar Tea Under-17 Netball Tournament.
Mutambo uyu unokotsverwa neTanganda Tea Company kuburikidza neStellar Tea yakabatana neNational Association of School Heads uye unogara uchitambwa gore negore.
Gore radarika, fainari yemutambo uyu yakatambirwa kuKariba kudunhu reMashonaland West uko chikoro chePamushana chekuMasvingo chakaita zvinorova ndokurambira nemukombe uyo wachakange chahwina kwemakore akawanda.
Mutambo uyu unotambwa nezvikoro zvakawanda uye mitambo yacho inotangira kumadistrict level uchikwira kusvika wave kumapurovhinzi uko zvikwata 12 zvinozosangana mufainari.
Gore rino fainari yemutambo uyu ichatambirwa pachikoro cheNyameni kuMarondera.
Achitaura akamirira Stellar Tea, Tsitsi Kumadiro, anoti gore rino kambani yavo yakaronga zvikuru pamutambo uyu uye ichapa mari zhinji yekubatsira kusimudzira netball.
“Gore rino takaronga zvikuru pamutambo weNash Stellar Tea Netball Tournament.
“Uyu mutambo unotambwa gore negore saka zvakakosha chaizvo kuti tiusimudzire Svondo rino kuMarondera ndipo patichauparura nekuzivisawo zvakare kuti tiri kudira mari yakawanda sei yekuukotsvera asi tinovimbisa kuti tine zvikuru zvakataronga,” akadaro Kumadiro.
Zvikwata 12 izvo zvinozotarisirwa kukwikwidza mufainari yemutambo uyu zvinoti 10 zvichahwina kumapurovhinzi kozoti shasha yegore radarika iyo ichange ichirwira kuchengetedza mukombe wayo pamwe nechikoro cheNyameni chinenge chichitambirwa mutambo uyu.
