Kwayedza
Muchaneta Chimuka
MAPURISA 179 eZimbabwe Republic Police (ZRP) Support Unit nemusi weChishanu chino vakatambidzwa zvitupa zvekupedza zvidzidzo zvinofambira nebumbiro remutemo wenyika mukubata kwavo basa nekuchengetedza runyararo.
Pamapurisa aya pane munhukadzi mumwe chete, uye vakaita zvidzidzo zvinosanganisira nhoroondo yeZimbabwe, bumbiro remutemo renyika, kurwisa vavengi, kushandiswa kwezvombo, kuchengetedza runyararo, kushandiswa kweredhiyo nekuziva nzvimbo dzakasiyana, pakati pezvimwe.
Vaive muyenzi anoremekedzwa, Officer Commanding Support Unit Commissioner David Mahoya, vanoti vanofara zvikuru kuti mapurisa aya akapedza zvidzidzo zvakanaka izvo zvichabatsira kuti vange vachibata basa nemazvo, zvikuru mukuchengetedza runyararo.
“Support Unit inozivikanwa nemukurumbira wekugona basa saka kuwedzerwa kweruzivo pakati pemapurisa kunobatsira zvikuru kuti vakwanise kurwisa nyaya dzekuparwa kwemhosva munyika uye kuchengetedza runyararo. Tinofanira kushanda nemazvo zvekuti vanhu havafanire kusara vaine mibvunzo maringe nebasa redu,” vanodaro.