Kwayedza
Abel Ndooka
CHIKWATA chenyika cherugby chemaYoung Sables cheUnder 20, icho chichanokwikwidza kumutambo weWorld Rugby U20 Trophy uchatambirwa kuKenya kutanga mwedzi unotevera, chichadomwa svondo rino.
Murairidzi wechikwata ichi – Shaun De Souza – anoti kupera kwesvondo rino vachadoma vatambi 35 avo vavachapinda navo mukembi vachisimbaradza gadziriro dzavo apo vakatarisana nekuenda kunorwira mukombe weWorld Cup.
Kumutambo uyu, maYoung Sables akaiswa muboka rine zvimwe zvikwata zvinoti Scotland, Urugual neCanada/USA muPool A.
Muhurukuro, De Souza anoti shuviro yavo kuumba chikwata chakasimba sezvo vanoda kuzonorwira kupinda muTop 4 yezvikwata zvichakwikwidza kumutambo uyu.
Pavatambi 35, vavachadoma svondo rino, 28 ndivo vachatakurwa kuenda navo kuKenya uye vamwe vanomwe vanosara vakamirira kuitira kana pakazokuvara vanenge vatakurwa kuenda kumutambo uyu.
“Apo mutambo weWorld Rugby U20 Trophy wave kuswedera pedyo, isu svondo rino ndipo tichadoma chikwata chedu chevatambi 35 chichapinda mukembi yekupedzisira takatarisana nemutambo uyu.
“Pavatambi 35 ava, 28 ndivo vatichaenda navo kuKenya, kuchiti vamwe vanomwe vachange vari pa’standby’ kuitira tikazoita vanenge vakuvara,” anodaro De Souza.
MaYoung Sables kutanga svondo rino achange achisangana nemusi weChitatu, China neChishanu uye nemusi weMugovera neSvondo achatamba mitambo yehushamwari nezvikwata zvakasiyana.
Izvi zvichabatsira mugadziriro dzechikwata ichi uye kupa mukana kuvarairidzi vacho wekusarudza vatambi vavanoda.
DeSouza anoti shuviro yavo kusvika kuTop 4 saka vanofanirwa kukunda Scotland mumutambo wavo wekutanga kuti zvigovapa mukana wekufambira mberi mumumakwikwi aya.
“Isu kumutambo uyu tinoda kusvika kuTop 4, ticharwa semvumba kuti tigosvika kure. Chekutanga, tinofanirwa kukunda Scotland nekuti ndiyo inogona kutiremera. Asi, tange tichiona mitambo yayo yakasiyana, tiri kuidzidza saka ticharwa semvumba kuti tigoikunda tifambire mberi mumutambo uyu,” anodaro De Souza.
