Kwayedza
SANGANO reBasketball Union of Zimbabwe riri muhurukuro nereZambia Basketball Federation uye nereMozambique dzekuronga mitambo yehushamwari iyo ichabatsira chikwata chemuno mugadziriro dzekuenda kunokwikwidza kumutambo weAfro-Basket African Championships Tunisia 2015.
Mutambo uyu uchatambirwa kuTunisia muna Nyamavhuvhu uye Zimbabwe yakaiswa muGroup D mune zvimwe zvikwata zvakaita seAlgeria, Cote d’Ivoire neCape Verde Islands.
Muhurukuro nahead of protocol media and publicity weBasketball Union of Zimbabwe, Shinga Magede, anoti varairidzi vechikwata chemuno vari kuda chaizvo kuti mitambo yehushamwari iyi itambwe muna Chikumi naChikunguru.
“Tiri muhurukuro neZambia neMozambique parizvino tichironga kuti vagouya kuno tizotamba navo mitambo yehushamwari yekubatsira chikwata chedu mugadziriro dzacho.
“Tinoshuvira chaizvo kuti chikwata chedu chiende kunoita zvakanaka kuTunisia saka mitambo iyi inobatsira kuti gadziriro dzacho dzifambe mugwara chairo,” akadaro Magede.
Zvakadaro, Magede anoti parizvino sangano ravo rine zvirongwa zvakasiyana zvariri kuronga zvekubatsira kutsvaga mari yekuti vatambi vavo vakwanise kuenda kumakwikwi ekuTunisia aya.
Svondo rino vakabatana nesangano reWith Love Foundation apo vatambi vechikwata ichi vakaenda kuMbare vakanobika sadza iro rakapihwa kune vanhu vanotambudzika. Magede anoti chinangwa chechiitiko ichi chaive chekutenda vatsigiri vechikwata chavo avo vanouya kuzovatsigira mumitambo yakasiyana.
Munguva inotevera, BUZ iri kuronga kuti vatambi vafambe rwendo rwetsoka (sponsored walk) nedonzvo rekutsvaga mari pamwe nekuita zvimwe zvakasiyana.
“Tine zvirongwa zvakawanda zvatiri kumhanyisa izvo zvatinoona kuti zvichatibatsira kutsvaga mari.
“Tinoziva kuti zvinhu zviri kunetsa masangano akasiyana saka isu hatichadi zvekungopemha chete, tave kuita zvirongwa zveduwo zvatinoona kuti zvichatibatsira mukuwana mari tizotumira chikwata kuTunisia,” akadaro Magede.
