Kwayedza
Abel Ndooka
ACHANGE ari makuwerere svondo rino kuNational Sports Stadium muHarare uko zvikoro zvemuHarare zvinenge zvichikwikwidza mumutambo weNational Association of Primary Heads Metropolitan Province Physical Education and Athletics Competitions.
Mitambo iyi iri kutanga musi weChina ichipera neChishanu uye madistricts manomwe achange achirwira kuzopinda muchikwata cheHarare icho chichazonokwikwidza kumitambo yeNAPH Provincial Physical Education and Athletics Competitions kuBindura mwedzi uno.
Madistricts achange achikwikwidza anoti Epworth/Mabvuku/Tafara, Northern Central, Warren Park/Malbereign, Glen View/Mufakose, High Glen, Mbare/Hatfield neChitungwiza.
Mitambo yesvondo rino ichange iri mumapato maviri anoti zuva rekutanga richange riri rePhysical Education (PE) kozoti rechipiri rinenge riri remujaho wekumhanya.
Munyori weNAPH mupurovhinzi yeHarare, Onias Kanengoni, anoti svondo rino vari kutarisira kuvaka chikwata chavo chakasimba icho vachazotumira kuBindura.
Zvakadaro, mushure memitambo yekuBindura, pachazoumbwa chikwata chichamirira Zimbabwe mumitambo yeConfederation of Southern Africa School Sport Associations (Cosassa) iyo ichatambirwa muHarare gore rino.
“Tiri kuvaka chikwata chedu cheHarare icho chatichazotumira kuBindura kunokwikwidza. Gore rino mitambo yeCosassa iri kutambirwa muno muHarare saka tinoda chaizvo kuti chikwata chedu chinge chine vatambi vakawanda vanove shasha,” akadaro Kanengoni.
