Kwayedza
Abel Ndooka
SHASHA 300 dzekarate dziri kutarisirwa kubandana svondo rino mumutambo we4th IKO Nakamura Zimbabwe Champ of Champs kuChitungwiza Aquatic Complex nemusi weSvondo.
Mutambo uyu uri kurongwa neInternational Karate Organization Nakamura Zimbabwe yakabatana neZimbabwe Karate Union uye unotambwa gore negore.
Mutevedzeri wasachigaro weZimbabwe Karate Union – Shihan Tawanda Mufundisi – anoti mutambo uyu mukuru uyo unoteverwa neshasha dzakawanda dzekarate dzemuno nedzinobva kunyika dzakaita seSouth Africa, Botswana, Namibia, Zambia neMalawi.
Mutambo uyu uchatambwa mumapoka anosanganisira evakomana nevasikana veUnder- 20 kgs, Under-55 kgs koita Open challenge yevakomana uye vasikana zvekare.
“Mutambo weChamps of Champs wadzoka zvekare uye kuchange kusingadanwe anonzwa svondo rino nemusi weSvondo paAquatic Complex uko vatambi 300 vekarate vachabandana.
“Uyu mutambo watinogara tichironga seZimbabwe Karate Union (ZKU) takabatana neInternational Karate Organization uye isu seZKU unotibatsira kuongorora vatambi vakasiyana avo vatinozosarudza kuzopinda muchikwata chenyika.
“Pavatambi vachauya, tinotarisira kuti pane vachabva kunyika dzemuAfrica dzinosanganisira South Africa, Zambia, Namibia neMalawi avo taikurukura navo vakati vanoda kuuyawo kuzokwikwidza mumutambo uyu,” anodaro Shihan Mufundisi.
Mutambo uyu makore achangodarika wainge wakambomiswa nekuda kwedenda reCovid-19 iro rakambokonzeresa kuti mitambo yose imbomiswa senzira yekudzivirira kupararira kwechirwere ichi.
Dzimwe shasha dzemuno dziri kutarisirwa kuuya kuzokwikwidza pamutambo uyu dzinosanganisira Wellington Kusikwenyu naRobert Mashingaidze.
