Kwayedza
Kingstone Mapupu
NYANZVI dzemutambo wekarate dzepanzvimbo yekusimbisa muviri yeFitness Planet iri kuShowground, muHarare dzakanotora mikombe miviri yesilver nebronze kunyika yeSouth Africa mushure mekukunda mumutambo weLen Barnes Tournament.
Makwikwi aya ndeekurangarira Shihan M. Songga uyo aiva nyanzvi mumutambo wekarate uye anocherechedzwa gore roga-roga.
Gore rino akaitirwa kuDurban uko Blessing Zaina (30), uyo anozivikanwa nezita remadunhurirwa rekuti Kenji Midori, naWaddie Masaku (27) vakawana mibairo miviri yesilver nebronze.
Zaina naMasaku vose vari padanho reBlack Belt Second Dan uye vakakwikwidza vari muzvikamu zvinoti Heavy Weight neLight Weight.
Zaina akakwikwidza muHeavy Weight kuchitiwo Masaku ndokukwikwidza kuchikamu cheLight Weight.
“Tose tichibva pamuzinda wedu weFitness Planet, takawana mibairo miviri. Ini ndakakwikwidzana nevatambi vatatu uye Waddie Masaku akakwikwidza nevatambi vana. Tinotenda sachigaro wemutambo wedu wekarate paFitness Planet, VaNaison Matingwina, nekusimudzira mutambo uyu,” anodaro Zaina.
Masaku anoti vose vari vaviri vasvitsa makore anodarika gumi vachiita mutambo uyu uye vave kudzidzisawo vamwe zvidavando zvawo.
“Tinoda kuramba tichisimudzira mutambo wekarate munyika muno, tichiunza mikombe seizvi. Tinodawo kuti vechidiki varambe vachiuya tichivadzidzisa mutambo uyu.
“Kune vamwe vanofunga kuti mutambo wekarate unofambidzana nehumbavha, kurwisana nezvimwe zvakaipa asi izvi ndinozviramba,” anodaro Masaku.
Matingwina anoti acharamba achisimudzira karate.
“Handina chinondimisa kuramba ndichitsigira mutambo uyu nekudaro ndinoti kune vechidiki vose, pamwe chete nevakuru ngavauye tisimbise miviri yedu, zvirwere zvinobuda matizi,” anodaro Matingwina.
