Kwayedza
Abel Ndooka
CHIKWATA chenyika checricket chemaChevrons nhasi chakakunda cheNetherlands ne6 wickets mumutambo wekurwira tikiti rekuenda kuICC World Cup 2023 kunyika yeIndia kutanga munaGumiguru.
Mumutambo wange uchitambirwa kuHarare Sports Club, Netherlands ndiyo yatanga kutamba (kubatter) ikaita 315 runs pabuda vatambi vatanhatu, maChevrons akazotamba ndokuita 319 runs pabuda vatambi vana.
Mumutambo uyu mutambi wemaChevrons — Sikandar Raza — atamba zvinonwisa mvura izvo zvamuona achiita 102 runs atamba mabhora 54 ukuwo atora mawickets mana apo Netherlands yange ichitamba.
Matambiro aRaza mumutambo uyu aona achipihwa mubairo wePlayer-of-the-Match.
Pari zvino maChevrons ahwina mitambo miviri yawo muboka rawo muGroup A zvichitevera kukunda kwavakaita Nepal ne8 wickets musi weSvondo wadarika.
Mumutambo wemaChevrons unotevera achasangana neWest Indies musi weMugovera ozosangana neUSA musi weMuvhuro unotevera.
Muboka rine maChevrons reGroup A muchabuda zvikwata zvitatu izvo zvichazoenda kuSuper Six kunosangana nezvitatu zvinenge zvabudawo mugroup B.
Zvikwata zviviri zvichazopedza zviri pamusoro kuSuper Six ndizvo zvinozohwina tikiti rekuenda kuWorld Cup.
