Kwayedza
Abel Ndooka
LIGI reChitungwiza Junior Football Development League (CJFDL) rinoti rakazvipira kurwisa kutorwa kwezvinodhaka nevechidiki nechinangwa chekusimudzira matarenda avo munyaya dzenhabvu.
Achitaura svondo radarika pamutambo weChitungwiza Junior Football League Under-15 Tournament wakatambirwa paChibuku Stadium, mutevedzeri wasachigaro weCJFDL – Livingstone Manhombo – anoti hupenyu hwevechidiki vazhinji huri kukanganiswa zvakanyanya nekutora zvinodhaka nekudaro donzvo ravo guru kurwisa dambudziko iri.
Anoti ligi ravo richabatsira vechidiki kuvagadzirira remangwana ravo nekuvadzidzisa nzira dzakasiyana dzekurarama nadzo dzakanaka.
“SeChitungwiza Junior Football Development League, donzvo redu kusimudzira vechidiki nekuvagadzirira gwara rakanaka chairo rekuti vararame naro vagobve mune zvinodhaka izvo zvinovadzosera kumashure.
“Isu tinoda kuona vana vedu vachibudirira naizvozvo takaungana ndokuvamba ligi redu rezvikwata zvakasiyana zvichakwikwidza mwaka uno tichienda mberi.
“Svondo rino, tange tine mutambo wedu mukuru wemaUnder-15 tichiona vatambi vane tarenda rinonwisa mvura. Sekuziva kwenyu, pazera remakore iri reUnder-15 ndipo chaipo panonyatsotangwa kubikwa vatambi saka tiri kushanda kuti tivabike vagobudirira mumutambo uyu remangwana ravo munhabvu ringe rakajeka,” anodaro Manhombo.
Pazvikwata zvisere zvemuboka reUnder-15 zvakatatsurana paChibuku Stadium svondo radarika, mutambo uyu wakazohwiniwa neVictors Academy iyo yakakunda MC99 Academy mufainari yainakidza kukunda ngoma kurira.
Mutambo uyu wakaona shasha dzakaita mukurumbira munhabvu dzinosanganisira Alois Bunjira naMusset Zengeni vachiuya kuzoona makwikwi aya.
