Kwayedza
Novak Djokovic abuda mumutambo weNational Bank Open unotambirwa kuToronto mwedzi uno nekuda kwekuneta, Tennis Canada inodaro.
Chizvarwa chekuSerbia ichi (36), masvondo adarika akapotsa nepadiki kuhwina mukombe weGrand Slam wechi24 zvichitevera kukundwa kwaakaitwa naCarlos Alcaraz mufainari yevarume yeWimbledon.
Djokovic anoti: “Ndinogara ndichifarira nguva yangu yese pandinouya kuCanada asi mushure mekuita hurukuro nechikwata changu, taona kuti iyi ndiyo nzira chaiyo yekufamba nayo.
“Ndinoda kutenda Karl Hale, mutungamiri wemutambo uyu, nekunzwisisa danho randatora iri.
‘’Ndinovimba chaizvo kuti ndichadzoka kuCanada nekuToronto makore anotevera kuzotamba pamberi pevatsigiri vanoyemura mutambo uyu.’’
Zvichitevera kubuda kwaDjokovic mumutambo uyu, uyo unotanga musi wa5 Nyamavhuvhu, Christopher Eubanks wekuUSA achawana mukana wekupinda mumakwishu aya.
Eubanks akasvika muquarter-fainari kuWimbledon apo akakunda mutambi wechishanu pasi rose, Stefanos Tsitsipas nechizvarwa chekuBritain Cameron Norrie. — SportMail Tennis
