Kwayedza
Munyori weKwayedza
GREAT Zimbabwe University (GZU) iri kuramba iri pamberi panyaya dzekurwisa Covid-19 zvichitevera kuparura kwayakaita fakitari yekusona nhumbi dzinoshandiswa nevari muchikamu chezveutano (personal protective equipment kana kuti PPEs) nemimwe midziyo inodzivirira kutapurirana chirwere ichi.
Yunivhesiti iyi — iyo iri kugadzira zvekare masanitiser ekuzora mumaoko — yakaenda pane chimwe chidanho chepamusoro chekuva nefakitari yekusona nhumbi pachikoro chayo cheRobert Mugabe School of Education chiri kuMasvingo.
VaAnderson Chipatiso, avo vanova Director for Information and Public Relations paGZU, vanoti yunivhesiti yavo yave padanho repamusoro-soro mukurwisa Covid-19.
Vanoti kunze kwekurwisa kupararira kwechirwere ichi, vadzidzi vavo vanofundira zvekare kusona mbatya dzakasiyana pachikoro chavakavhura ichi.
“Takavhura chikoro chemhando yepamusoro chekusona cheRobert Mugabe School of Education uko tinosona nekugadzira maPPE anosanganisira magauni, zvikepesi nezvimwe zvinobatsira varapi,” vanopdaro VaChipatiso.
Vanoti kuvhurwa kwefekitari iyi kuchaona mitengo yemaPPE ichiderera pamwe nekuwanikwa nyore kuvashandi vemuzvipatara zveveruzhinji.
“Tiri zvekare pachidanho chepamusoro chekugadzira masanitiser ayo tinoda kugadzira nehuwandu hwawo pamuzinda mumwe chete uyu,” vanodaro.
Vice-Chancellor weGZU, Professor Rungano Zvobgo vanoti muzinda uyu uchava mhinduro kumatambudziko akasiyana ari kusanganikwa nawo mukurwisa Covid-19 muZimbabwe.
Yunivhesiti iyi iri kushandisa ethanol, inobva mukugadzirwa kwetsvigiri kuChiredzi, muchirongwa chayo chekugadzira masanitiser.
Mune imwewo nyaya inodyidzana neiyi, Harare Institute of Technology (HIT) ine hurongwa hwave padanho repamusoro hwekugadzira mamasiki emhando yeN95 ayo anoshandiswa kamwe chete evashandi vezveutano vari pamberi munyaya dzekurwisa Covid-19.
Sangano reWorld Health Organisation rakatara mhando yemamasiki anofanirwa kushandiswa nevashandi vezveutano vari panjodzi yekutapurirwa chirwere ichi.
Mamasiki emhando yeN95 anovhara zvizere mhuno nemuromo zvinoita kuti pasawane chinhu chinofamba nemumhepo chinopinda mukati.
Anoshandiswa kamwe chete obva araswa nekudaro kugadzirwa kwawo kunodawo mari yakawanda.
Gurukota redzidzo yepamusoro, sainzi nekuvandudzwa kweruzivo rwemichina, Professor Amon Murwira vanoti HIT nezvimwe zvikoro zvepamusoro zviri kuita basa guru mukugadzira zvinhu zvinodiwa mukurwisa Covid-19.
“Mayunivhesiti aya agara achisona nhumbi dzekuzvichengetedza nekugadzira masanitiser.
“Izvi zvinhu zvekuti taifanirwa kunge tichizvitenga kubva kunze. Pane zvimwe zvinhu zvatisingachatenga kunze zvachose. Semuenzaniso, zvekuvharisa kumeso (face shields).
“Zvose zvekuvharisa kumeso zviri kushandiswa neveruzhinji muno zviri kugadzirwa nemayunivhesiti edu,” vanodaro.
Prof Murwira vanoenderera mberi vachiti, “Mushure mekuita ongororo yezvinodiwa, HIT nezvimwe zvikoro zvepamusoro vanofanirwa kuona kuti vangagadzire sei muchina unozogadziriswa mamasiki aya.
“Vanogona zvakare kugadzira muchina unogadzira mamasiki nehuwandu hwawo sekudiwa kwaanenge achiitwa.
“Ndinovimba kuti mumasvondo mashoma ari kutevera tichange tave nezvinobatika.
“Maenjiniya (engineer) epaHIT vari kushanda nesimba kutaura kuno.”
