Kwayedza
Abel Ndooka
CHIKWATA chenyika checricket chemaChevrons chakaenda kuAustralia uko chichabandana nemaAussies mumitambo mitatu yeOne Day International yeSuper League yekurwira kuenda kuInternational Cricket Council (ICC) World Cup India 2023.
Zvichitevera kupera kwakaita mutambo wemaChevrons neIndia weODI uyo chikwata chemuno chakakundwa “whitewash”, akabva atonanga kuAustralia kunorwira zvibodzwa zvekuenda kuWorld Cup.
MaChevrons neAustralia achatamba mitambo mitatu kutanga nemusi weSvondo apo wechipiri uchizotambwa svondo rinotevera musi weChitatu uye wekupedzisira uchatambwa musi wa3 Gunyana.
Muchinyorwa chakabva kuZimbabwe Cricket (ZC), mukushi wemashoko weZC, Darlington Majonga anoti mutambo uyu wakakosha zvikuru kumaChevrons.
Anoti kana chikwata chenyika chakahwinha mutambo uyu zvibodzwa zvavo zvinoramba zvichiwedzera izvo zvinozovabatsira kubudirira murwendo rwekuenda kuWorld Cup vasingazotambiswe mimwe mitambo.
“Mutambo uyu ndewezvikwata 13 wekurwira kuenda kuICC Men’s Cricket World Cup 2023 iyo ichatambirwa kuIndia,” anodaro.
Chikwata chenyika ichi chakaenda nemutambi wacho Blessing Muzarabani uyo akakundikana kutamba neIndia sezvo ainge akakuvara.
Zvisinei, maChevrons achange asina vamwe vatambi vakakosha vanosanganisira Craig Ervine, Tendai Chatara, Wellington Masakadza naMilton Shumba.
Lady Chevrons
Kuchitiwo nerimwe divi, chikwata chemaLady Chevrons chiri kusangana necheSouth Africa cheEmerging Women Team apo chiri kuita gadziriro dzekuenda kuUnited Arab Emirates kumitambo yekurwira kuenda kuICC Women’s T20 World Cup.
ZC yakaumba chikwata chevatambi 15 avo yakatakura kuenda navo kuSouth Africa.
MaLady Chevrons neSouth Africa vachasangana muzuva anoti 28, 29, 31 Nyamavhuvhu uye 2 na3 Gunyana.
