Kwayedza
CHAMANGWIZA wesangano rinoona nezvenhabvu munyika reZimbabwe Football Association, Jonathan Mashingaidze, anoti chikwata chenyika chenhabvu chemaWarriors icho chichadomwa kuenda kumutambo weCouncil of Southern Africa Football Association (Cosafa) Cup ndicho chavachazoshandisa kumakwikwi emutambo weAfcon 2017.
Mutambo weCosafa Cup uchatambirwa kuSouth Africa kutanga musi weSvondo uye zvikwata 14 zvichange zvichikwikwidza kupurovhinzi yeNorth West.
MaWarriors akapinda mukembi musi weMuvhuro svondo rino umo ange achiita gadziriro dzemutambo uyu uye anotarisirwa kusimuka neChina akananga kuSouth Africa.
Mashingaidze anoti vari kushandisa mutambo weCosafa Cup kuumba chikwata chavo apo vakatarisana nekutanga kurwira mutambo weAfrican Cup of Nations.
Afcon ichaona maWarriors achisangana neMalawi mumutambo wekutanga uchatambirwa kunyika iyi musi waChikumi 13.
Gore rino, maWarriors achatamba mitambo yakawanda inoti yeAfcon Qualifiers neyeAfrican Nations Championships (CHAN) Qualifiers uye yose ichatanga muna Chikumi.
“Takaronga kuti tichangoshandisa chikwata icho tichatumira kunokwikwidza kumutambo weCosafa Cup uyo uchatambirwa kuSouth Africa.
“Gore rino tine mitambo yakawanda zvikuru saka tichangoti chikwata chimwe chete icho chichanokwikwidza kuCosafa kuSouth Africa ndicho chichazokwikwidza mumitambo yeAfcon neCHAN zvekare asi tichazongochivandudza nekufamba kwenguva.
“Cosafa painongopera, tichabva tangotanga gadziriro dzeAfcon nedzeCHAN,” akadaro Mashingaidze.
Mashingaidze akaenderera mberi ndokuti maWarriors apo achange achiita gadziriro dzawo havana mitambo yehushamwari yavakavarongera sezvo vari kumashure kwenguva.
Anoti nguva inodikanwa neFifa kuti zvikwata zvizivise kuti zvichasangana nezvipi pamitambo yehushamwari yakadarika.
Asi anoti parizvino vari muhurukuro neMalawi neZambia kuti vatsvage zuva rekutamba mitambo yehushamwari.
Zvakadaro, kumutambo weCosafa Cup, maWarriors akaiswa muGroup A umo mune zvimwe zvikwata zvinoti Namibia, Mauritius neSeychelles. Zimbabwe mumutambo wayo wekutanga ichasangana neMauritius iyo inozivikanwa zvekare seLes Dodos kana kuti Club M.
