Kwayedza
Kingstone Mapupu
CHIREMBA wechivanhu wemuHarare, Sekuru Kamwelo Banda, nemusi weChipiri svondo rino vakabatsira misha mitatu inochengetwa nherera muHarare nezvekudya uyewo ndokuzopa vana vechikoro kuEpworth mayunifomu nekuvimbisa kuvabhadharira mari dzechikoro.
Vamwe vevakabatsirwa machembere neharahwa avo vakapihwa kudya nezvimwe zvakasiyana.
Zvinhu zvakapihwa nherera, chembere neharahwa naSekuru Banda zvinosanganisira mupunga, shuga, mafuta ekubikisa, hupfu, zvinwiwa nesipo. Misha inochengeta nherera yakabatsirwa negodobori iri ndeinoti Harare Children’s Home, Mashambanzou neMatthew Rusike Children’s Home.
Mai Beatrice Sithole, avo vanova mukuru weHarare Children’s Home – iyo yakavambwa mugore ra1918 – vanotenda rubatsiro rwaSekuru Banda.
“Tine vana vanobvira patusvava kusvika kuvakuru vari kuenda kupuraimari nesekondari vanokwana 88 avo vanoda kudya. Nhasi taigirwa kudya kunosanganisira hupfu, mafuta ekubikisa, zvinwiwa, mupunga nesipo yekugezesa. Tinotenda uye pabviswa pacho pawedzerwe kuna Sekuru Banda,” vanodaro.
Vanoti vane zvakawanda zvavanoda pamusha wavo izvo zvavanotarisirawo kubatsirwa nevane tsiye nyoro.
“Kunze kwezvekudya nezvekupfeka, vana vedu vane kuzvikoro kwavanoenda vachibhadharirwa mari nemasangano akazvimirira, izvo tinoda kuramba tichibatsirwa sezvo kuine zvikwereti,” vanodaro. Vachipawo kutenda kwavo, Sister Kudzai Nherera vepaMashambanzou – apo pane nherera 145 – vanoti rubatsiro urwu rwauya panguva yakakodzera.
“Tinotenda nechipo ichi, chauya panguva iyo tichipemberera Goredzva. Tinongovaverenga mumapepanhau Sekuru Banda nekuvanzwa panhepfenyuro, aiwa tinotenda zvikuru,” vanodaro.
Mashoko avo anotsinhirwa naDr Duri vepaMashambanzou pakare vachiti: “Tinotenda Dr Banda nechipo chavatipa uye nekubatsirawo kwavanoita mukurapa vanhu.” Reverend Linle Link Mutendzwva, avo vanova mukuru weMatthew Rusike Children’s Home, vanokurudzira makambani nevanhu vakazvimirira kuti vatevere matsimba aSekuru Banda kuburikidza nekubatsira vanotambura.
“Tine vana 145 vatinochengeta vanoenda kuzvikoro zvakasiyana muno kubva kuECD.
“Kudya uku kuchatibatsira zvikuru tichitiwo kune vamwe vatibatsirewo nembatya dzechikoro nemari yemafizi uyewo tine kiriniki pano,” vanodaro. Imwe yeharawa dzakabatsirwa nezvekudya nesipo, Sekuru Byson Sipanera (94), vakava nemufaro mukuru.
“Ndanga ndisina hupfu, zvino Sekuru Banda ndivo ‘mwari’ wangu nhasi. Vandibatsira nehupfu, sipo, mafuta nezvinwiwa. Chokwadi Mwari ngaavasimudzire, vapa vana vedu mbatya dzechikoro, vanga vachienda kuchikoro nemamvemve,” vanodaro.
Mashoko avo anotsinhirwa naMbuya Pauline Engisi (87) pamwe naSekuru Daniel Chizema (67) vachiti Sekuru Banda vane chido nevanotambura.
