Kwayedza
Abel Ndooka
MUTAMBI wemaChevrons – Sikandar Raza – akagadzwa kuve kaputeni wechikwata chichatamba mitambo yeT20 International Series.
MaChevrons anotamba mhando nhatu dzecricket dzinoti Test Match, One Day International (ODI) neT20 International.
Pamitambo mitatu iyi, yeTest Match neODI zvichatungamirirwa naCraig Ervine kuchiti Raza ndiye achatungamira yeT20.
Svondo radarika, bhodhi reZimbabwe Cricket rakasangana kuVictoria Falls uko rakaita musangano ndokushandura zvinhu zvakawanda maringe nemutambo uyu zvinosanganisira vatungamiri vevamwe vatambi nekudzora Dave Houghton kuti arambe achirairidza maChevrons.
Muchinyorwa chakabva kuZimbabwe Cricket, mukushi wemashoko weZC – Darlington Majonga – anoti Raza akasarudzwa kuti azotungamira chikwata cheT20 nekuda kwematambiro aange achiita anonwisa mvura mwedzi yadarika.
“Mutambi Sikandar Raza akasarudzwa kuve kaputeni mutsva weZimbabwe T20 International mushanduko imwe yakaitwa nebhodhi reZimbabwe Cricket zvichitevera musangano wavakaita kuVictoria Falls nemusi weMugovera wadarika.
“Ari kutsiva Craig Ervine uyo achange ave kutungamira chikwata chinotamba mitambo yeTest Match neyeOne Day International Cricket.
“Nekuda kusimbaradza chikwata ichi pamwe nekuedza kuhwina tikiti rekuenda kuICC Men’s T20 World Cup 2024, bhodhi rakadzora Dave Houghton kuti arambe ari murairidzi wechikwata chenyika,” anodaro Majonga.
Dave Houghton
Basa rekusarudza vanozotambira maChevrons, iro raiitwa naDavid Mutendera, richange rave kuitwa nenhengo nhatu dzinosanganisira iye Mutendera, Houghton naElton Chigumbura.
Majonga anoti pakasangana bhodhi iri kuVictoria Falls, raisafara nekukundwa kwakaitwa maChevrons neNamibia mumutambo wehushamwari wekugadzirira kuzorwira tikiti rekuenda kuT20 World Cup.
“Pamusangano uyu, bhodhi rakarakidza kushushikana zvikuru nechikwata chevarume nematambiro achakaita kuNamibia mumutambo weT20 uko chakakundwa mitambo mitatu ndokuhwina miviri chete,” anodaro Majonga.
Zvakadaro, kuchikwata chemadzimai chemaLady Chevrons hakuna shanduko yakaitwa.
Asi bhodhi reZC rinoti riri kumboongorora chikwata ichi nematambiro achichaita kuICC Women’s T20 World Cup Qualifier kuUganda munaZvita.
Gary Brent ndiye achiri murairidzi wechikwata ichi uye Mary-Anne Musonda acharamba ari kaputeni wemaLady Chevrons.
“Hakuna shanduko kuzvikwata zvemadzimai, kunyangwe hazvo bhodhi richazoongorora remangwana remurairidzi wechikwata cheZimbabwe Senior Women’s Team, Gary Brent nakaputeni Mary-Anne Musonda pachapera mutambo weICC Women’s T20 World Cup Africa Qualifier uyo uchatambirwa kuUganda munaZvita,” anodaro Majonga.
