Kwayedza
Kingstone Mapupu
NHENGO iri kumiririra bato riri kutonga reZanu-PF musarudzo dzekutsvaga mumiririri weMabvuku-Tafara mudare reNational Assembly, Cde Scott Sakupwanya, vabatsira panhamo yaMr Ugly Mison Sere, nezvinhu zvakasiyana-siyana.
Mison (51) akashaika neChipiri chino kumba kwasekuru vake, Dunny Sere Snr (48) apo aigara.
Cde Sakupwanya vakabatsira panhamo iyi nehupfu hunokwana 80 kgs, mafuta ekubikisa, muriwo, madomasi, munyu, nezvimwe zvakawanda uye ndokuvimbisa kuramba vachitambanudza ruwoko rwavo kusvikira nhamo iyi yapera.
Cde Charles Gawu, avo vaitungamirira chikwata chevanhu vakauya nerubatsiro urwu, vanoti Cde Sakupwanya vakaona zvakakodzera kubatsira parufu urwu sezvavagara vachiita mudzimwe nhamo kana vachinge vaziviswa.
Cde Gawu (pakati) vachitambidza hupfu
“Nhamo ndeyemunhu wose saka Cde Sakupwanya vabatsira mhuri iyi panhamo yaMison Sere nehupfu, mafuta, muriwo, madomasi nezvimwe. Vanoti havana kugumira ipapa, vachabatsira nezvimwe kusvikira nhamo iyi yapera, munhu avigwa,” vanodaro Cde Gawu.
Sachigaro weZanu-PF kuMabvuku District, Cde Murimi Munyaradzi, vanovimbisawo kuti vachamirira nhamo iyi kusvikira Mison avigwa.
“Tichabatsirana nemhuri iyi kusvikira mutumbi wavigwa, tinenge tichisvitsa zvose kuna Cde Sakupwanya,” vanodaro Cde Munyaradzi.
VaDunny Sere Snr vanotenda rubatsiro rwavakapihwa urwu.
“Tinotenda nekubatsirwa uku sezvo tanga takatoomerwa. Hatizive pamwe vavaimboshanda navo mumakwikwi avo aMr Ugly Zimbabwe vachauyawo. Muzukuru wangu panguva yaakawana mukombe wekunyangara anonzi akapihwa motokari, sitendi yekuvaka imba kuRuwa nemari asi hapana chatakaona. Iye muridzi aingoti hapana chaakapihwa,” vanodaro VaDunny Sere Snr.
Vanobuda pachena kuti muzukuru wavo anogona kunge akafa nekuda kwekutora zvinodhaka.
“Doro rainwiwa nemuzukuru wangu rinoda kudya, zvino Mison akanga asingadye, aimuka husiku achidzoka husiku achingonwa tudoro twavo utwu,” vanodaro.
Mai Sharon Sere (26), vanova amainini vaMison, vanotora mukana uyu kutsiurawo vechidiki nevamwe kuti vasiye kushandisa zvinodhaka.
“Mwana wangu zviri pachena kuti auraiwa nedoro, tisatsvage varoyi pano. Chake kwaiva kunwa doro nekutevedza nhamo, munhu asinawo kumbobvira akarapwa zvake,” vanodaro Mai Sharon Sere.
Mai Julia Sere (53) vanove hanzvadzi yaMison vanotiwo vanoda kuziva kwakaenda zvinhu zvaakavimbiswa paakawana mukombe weMr Ugly Zimbabwe.
“Hongu, afa Mison asi tinodawo kuziva vakamuvimbisa kuti akawana motokari, sitendi yemba nemari kuti zvakazofamba sei nekuti iye anoti hapana chaakaona uye isuwo hapana chatakaona,” vanodaro Mai Julia Sere.
Daison Sere (31) munin’ina waMison anoti chavakaona chete ipasipoti iyo akatoreswa achinzi aida kuendeswa kunyika yeSouth Africa.
