Kwayedza
Gore rino, mutambo uyu uchange uine zvikwata 12 kusanganisira zviviri zvinoti Pamushana High yekuMasvingo iyo yakahwina mukombe uyu gore radarika neSobukhazi School yekuBulawayo inove ichatambirwa fainari yegore rino.ACHANGE ari makuwerere svondo rino kumapurovhinzi anoti Mashonaland West, Mashonaland East neBulawayo uko zvikoro zvakasiyana zvichange zvichibandana mumakwikwi eStellaTea Under-17 Provincials Finals.
Zvimwe zvikoro zvakabudirira kupinda mumakwikwi aya zvinoti Girls High (Harare) iyo iri kukwikwidza mumutambo uyu kekutanga, Hande Secondary (Manicaland), Muneni (Midlands), Mvurwi (Mash Central) neChekai (Masvingo).
Tsitsi Kumadiro wekambani yeStella Tea, iyo inove iri kukotsvera makwikwi aya, anoti ari kubatsira zvikuru mukusimudzira netball munyika yose izvo zviri kuonekwa nevatambi vakaita saSharon Bwanali uyo ave kutambira zvikwata zvenyika zvemapoka akasiyana.
Kumadiro anoti zvinodadisa zvikuru kuona vatambi vakaita saBwanali vachisimudza mureza wenyika kumitambo yakasiyana.
Anoti kambani yavo yakazvipira kuramba ichikotsvera mutambo uyu.
“Isu sevakotsveri vemutambo uyu tinofara kana tichiona vana vakasimudzirwa nawo vachibudirira vachienda kunosimudza mureza wenyika. Zvinotipa manyuku-nyuku kuti tirambe tichidira mari yekuronga mutambo uyu.
“SeStella Tea takazvipira kusimudzira vanasikana nemutambo uyu wenetball. Gore rino tiri tarisira kuona mutambo unonakidza zvikuru.
“Zvimwe zvikwata ngazvikwiridzire masokisi azvo kuti zvirwisane nePamushana zvigosimudzawo mukombe,” anodaro Kumadiro. Pamushana High School yave nemakore mana ichingohwina mukombe uyu.
