Kwayedza
Kingstone Mapupu
MAPURISA ari kuyambira veruzhinji kuti vasiyane netsika yekukwira motokari dzemushikashika sezvo vakawanda vari kuguma vasangana netsekwende dzinosanganisira kupondwa, kubirwa uye vanhukadzi vachibatwa chibharo.
Yambiro iyi yakapihwa nemutauriri wemapurisa kudunhu reMidlands, Inspector Emmanuel Mahoko, zvichitevera kubirwa kwemumwe murume wekuShurugwi mari nenhare apo akanga akwira motokari yemushikashika mumugwagwa weShurugwi-Masvingo.
“Tinogara tichipa yambiro kuruzhinji kuti vasakwire motokari dzemishikashika sezvo paine njodzi dzinogona kusangana nevanhu dzinosanganisira kubirwa kana kupondwa. Izvozvi tine murume wemakore 52 ekuberekwa akabirwa US$385 nenhare nemusi wa22 Chivabvu nenguva dzemanheru kuShurugwi akwira motokari yemushikashika,” vanodaro Insp Mahoko.
Vanoti murume uyu akabirwa nembavha nhatu dzaiva mumotokari yaakakwira.
“Murume anonzi Felix Matenda (52) wemubhuku raMunikwa akakwira motokari yerudzi rweHonda Fit yaiva nevarume vatatu mukati padyo negaraji reGlow Service Station achida kuenda kuGamwa, kuShurugwi. Motokari iyi payakasvika pamugodhi weTodal panobuda mumwe mugwagwa mune weShurugwi-Masvingo, mutyairi akatsautsa motokari mumugwagwa ndokuimisa padivi.
“Mumwe wevarume vaivamo akaburitsa banga remhando yeOkapi ndokuvhundutsira murume uyu kuti vaigona kumuuraya vachibva vamubira mari nenhare,” vanodaro Insp Mahoko.
Vanoti makororo aya mushure mekubira murume uyu, vakabva vamusiya pasango ivo ndokuvhetemetsa motokari vachitiza.
“Tiri kukumbira kuruzhinji kune vanoziva zvakaitika kuti vakwanise kubatsira nemashoko anoita kuti vapari vemhosva iyi vasungwe. Vanhu vakasununguka kuenda kumapurisa ari pedyo navo vonyevera zvavanoziva,” vanodaro.
Insp Mahoko vanoti mumigwagwa yose yemunyika nemuzviteshe kana mumisika, mune nzvimbo dzinotakurira mabhazi makuru anokwirwa neruzhinji umo vanhu vanofanirwa kushandisa.
