Kwayedza
CHIKWATA chenyika checricket chemaChevrons chiri kutarisirwa kunanga kuBangladesh svondo rino uko chichanotamba nemaTigers, sezita remadunhurirwa reBangladesh Cricket, mitambo mishanu.
Svondo radarika, maChevrons akanyadziswa zvikuru apo akakundwa 3-2 neAfghanistan mumitambo yeODI iyo yaaitarisirwa kuhwina izvo zvakashoresa chikwata ichi zvikuru.
Mitambo yemaChevrons neAfghanistan yaitambirwa kuQueens Sports Club kuBulawayo.
Zvakadaro, svondo rino maChevrons anofanirwa kukwidziridza masokisi awo sezvo aishungurudzwa neBangladesh pose pavaisangana makore adarika.
Gore radarika, maChevrons akakundwa 5-0 mumitambo yakasiyana nemaTigers iyo inonzi “whitewash” mucricket zvinova zvakanyadzisa zvikuru chikwata ichi.
Mitambo yemaChevrons neBangladesh yekutanga yeODI ichatambwa musi wa7, 9 na15 Mbudzi kozoti yeTwenty20 ichatambwa musi wa13 na15 Mbudzi zvakare.
Parizvino maChevrons ange achitamba mitambo yeTwenty20 neAfghanistan iyo yaari kushandisa senzira yekugadzirira kuzoenda kumakwikwi eInternational Cricket Council Twenty20 International Matches World Cup 2016 kuIndia.
Zvakadaro, apo chikwata cheZimbabwe chevakuru chiri kuenda kuBangladesh, cheBangladesh A chiri kutarisirwawo kuuya kuHarare kuzotamba neZimbabwe A mumitambo yemitatu yeODi nemiviri yetest match.
