Kwayedza
VADZIDZI vari kukurudzirwa kukoshesa zvidzidzo zvemabasa emawoko izvo zvinoenderana nechirongwa chekuvandudza upfumi hwenyika, cheZim-Asset.
Kurudziro iyi yakaitwa svondo rapera nemukuru wekanzuru inoona nezvebvunzo, yeZimbabwe School Examinations Council (Zimsec), VaEsau Nhandara, pakupedza zvidzidzo kwevadzidzi 141 pakoreji yeInstitute of People Management of Zimbabwe (IPMZ), muHarare.
Zvidzidzo zvakaitwa izvi zvine chekuita nekusimudzira mushandi pabasa zvakaita seLabour Relations, Public Relations neHuman Resource Management.
“Ndinoti pamberi nekuita makosi nezvidzidzo zvemabasa emawoko izvo zvinoenderana nechirongwa cheHurumende chekuvandudza upfumi hwenyika, cheZim-Asset.”
VaNhandara vakakurudzira vadzidzi kuti vaenderere mberi nefundo zvisinei nekunetsa kuri kuita kuwana mabasa munyika.
“Dzidzo inhaka yeupenyu zvisinei nekushaikwa kwemabasa. Naizvozvo ndinoti kune vapedza zvidzidzo maita zvakanaka nekukoshesa dzidzo, vanouya kumashure vanoteverawo gwara rakanaka,” vakadaro.
Vakarumbidzawo IPMZ nekubura kwairi kuita vadzidzi vemhando yepamusoro.
