Kwayedza
Mudhumeni mukuru Ivan Craig
VANOONGORORA mamiriro ekunze vari kuti zvakabuda kuti mwaka watiri kupinda uchange usina mvura yakatsarukana. Nekudaro murimi haafanire kurohwa nehana kusvika pakutadza kugadzirira zvakakwana.
Chemurimi bedzi kutarisa pasi mumunda make, zvekudenga osiira Mwari nokuti Nyadenga ndiye oga anoziva nguva ichanaya mvura uye nemanairo ayo.
Vaongorori vemamiriro ekunze vakatipawo mukana wekuti tigadzirire zvakakwana takatarisana nezvavakaona zvekuti mwaka uno ungangonaya mvura yakakwana zvichidzika kusvika kushomanini.
Semurimi, unenge uchikurudzirwa kuti minda igadzirirwe zvakakwana uye zvakanaka, tichisanganisira kushandisa nzira dzekuchengetedza nadzo mvura inenge yanaya. Chekutanga ndechekubata mvura yose yanaya, chepiri kuichengetedza ichishandiswa nemazvo.
Kune nzira mbiri dzinoshandiswa kugadzirira minda tisati tadyara. Panoti kurima minda nemagejo kana kudyara pasina kurimwa, iya inonzi “zero” kana kuti “minimum tillage”.
Ingave ipi zvayo nzira yasarudzwa nemurimi, inofanirwa kuitwa nemazvo. Nzira yekurima, murimi anokurudzirwa kuti munda wake uiswe “ripper” kwapera makore mana (4 years) dzoga-dzoga muvhu rejecha kana kuti makore mashanu (5 years) muvhu rakasimba. Izvi zvinobatsira kuti mvura yose yanaya idzike pasi uye midzi yezvirimwa inodzika pasi zvakare. Murimi anozotevera negejo richinatsa kudzika pasi kuitira kubatsira kubata mvura zhinji inenge yanaya. Hara inozotevera shure kuitira kupunza mavhinga kuti mbeu dzinyatsomera zvizere uye zvine simba.
Munda wakarimwa nemazvo:
Kune avo vanofarira zve”zero tillage” munokurudzirwa kuti munyatsoita zvizere kuitira kuti nzira iyi ishande zvinoyevedza. Munda haufaniri kupiswa huswa, masora pamwe nemashanga kwemakore anodarika mashanu kuitira kuti mumunda munge muine “capet” yakakwana kuti ibate mvura yakawanda uye kuti isarase mvura mumhepo. Pane avo varimi vari kuita dhiga udye (iyi nzira yakafanana ne”zero tillage”) saka kuti inatse kushanda inoda mahuswa, mashanga kana murakwani.
Minda yagadzirwa haifaniri kupindwa nemombe kana kufambwa nevanhu nokuti inotsindirika.
Zvekushandisa:
Murimi anofanirwa kunge akarongedzera zvose zvaanoda kushandisa zvinofanira kunge zvava pamusha kana papurazi zvakafanana nefetireza yepasi, mishonga yesora, mbeu nemimwe midziyo yekushandisa. Murimi ngaasayeuka bako kwanaya.
Murimi anoda mbeu inokwana kuita makg makumi maviri ane mashanu (25kg) pahekita yoga-yoga kana kuti makg gumi (10kg) paeka yoga-yoga. Mafetireza yepasi unoda masaga manomwe pahekita kana kuti matatu paeka yoga-yoga.
Kuchengetedza ivhu – Nhaka yamangwana:
Kana munhu achitaura nyaya yenhaka, inofanira kuti munhu ari kuiwana ange achisara achishandisa nhaka yakakwana uyezve yakanaka ichimupa pundutso. Asi ndiri kuona varimi vazhinji havasi kuzviona kuti yavari kuti nhaka haisi nhaka zvachose nokuti havasi kuchengetedza ivhu racho inova ndiyo nhaka yacho.
Varimi munokurudzirwa kuti muchengetedze ivhu kuitira kuti vachasara vachitora nhaka iyi vawanewo goho kubva mariri. Makandiwa anosungirwa kuti murimi ange ainawo muminda yake.
