Kwayedza
Kingstone Mapupu
MURUME wekuBindura anonzi akazvisungirira pamba paairoja nekuda kwechikonzero chisati chazivikanwa apo mutumbi wake wakazongowanikwa wakarembera mumba.
Assistant Inspector Naison Dhliwayo — avo vakafanobata chigaro chemutaruriri wemapurisa kudunhu reMashonaland Central — vanotsinhira nyaya iyi. Vanoti Mugove Badza (24) airoja panhamba 126 mumugwagwa waSojini Street mumusha weChipadze anonzi akawanikwa akazvisungirira nemusi wa14 Ndira.
Mugove anonzi akabva pamba pevabereki vake vanove vakavakidzana nepamba paairoja ndokuenda kumba kwake uko akasvikozvisungirira.
“Mugove Badza akabva pamba pevabereki vake nenguva dza10 mangwanani achienda kwaairoja ndokusvikozvisungirira mumba umu. Mukoma wake, Kudakwashe Badza, akazoenda kumba uku achida kunomutarisa nenguva dza15:30 hours apo akazowana mutumbi wake wakarembera,” vanodaro Asst Insp Dhliwayo.
Kudakwashe anonzi akazotaurira muridzi wemba Mai Tecla Cheziya (42) avo vakazomhanya kunozivisa mapurisa eZRP Chiwaridzo. Mutumbi waMugove wakazoendeswa kuchipatara cheBindura Provincial Hospital kuti unoongororwa.
“Ikurudziro yedu kuti vanhu vasafunge zvekuzviuraya kana pane zvinovanetsa, asi kuti vatsvage vanovabatsira vakaita semapurisa anodyidzana neruzhinji kana dzimwe hama, mafundisi nevamwe,” vanodaro.
Zvichakadai, Asst Insp Dhliwayo vanoti kune tsaona yakaitika mumugwagwa weHarare-Mukumbura, kuMadziva masikati emusi wa13 Ndira pakakuvara munhu mumwe chete zvakaipisisa.
“Pane motokari yemhando yeNissan Sylphy yeruvara rwesirivha nenhamba pureti dzinoti ADD2947 yaityairwa naCrsipen Mazodze (52) anobva mudzimba dzemudurikidzwa dzeNandi, kuBindura uyo anonzi akatsika Garikai Jonga (65) wemubhuku raGaradziko kwaMambo Mutumba, kuMadziva,” vanodaro Asst Insp Dhliwayo.
Mutyairi wemotokari iyi anonzi aiva oga uye akaenda kurutivi rwemotokari dzaaipesana nadzo apo akazonotsika Jonga aiva achisunda bhara ari kunze kwemugwagwa.
“Jonga akakuvara mumusoro, ndokutyoka gumbo rekuruboshwe nekukuvara zvakare ibvi uye akazoendeswa kuchipatara cheBindura uko ari kurapwa,” vanodaro Asst Insp Dhliwayo.
