Kwayedza
Abel Ndooka
VATAMBI vemaWarriors vaviri – Teenage Hadebe weHouston Dynamo yekuAmerica naSilas Songani uyo anotambira Vestri yekuIceland – svondo radarika vakasimudza mikombe kuzvikwata zvavo.
Houston Dynamo yakahwina mukombe weUS Open Cup mushure mekukunda Inter Miami iyo inotambirwa naLionel Messi 2-1 mufainari yemutambo uyu.
Kuchiti Songani chikwata chake chakahwina mukombe weplayoff final iyo yakaona ichiwana tikiti rekuzotambira muligi hombe rekuIceland reBesta Deild Karla.
Mumwaka uchangopera kuIceland, Songani kuchikwata chake cheVestri akakwanisa kutamba mitambo yese 22 yeligi uye ndokunwisa kana (4) apo vairwira kupinda muBesta Deild Karla. Kunwisa kwaakaita kana (4) kwakaona Songani achipedza ari pechipiri pavatambi vakanwisa kakawanda kuchikwata ichi.
Vladimir Tufegdzic ndiye akapedza ari top goal scorer kuVestri mumwaka uyo akanwisa ka10. Muhurukuro neKwayedza zvichitevera kusimudza kwaakaita mukombe neVestri ari kuIceland, Songani anoti zvinhu zvinofadza uye zvinoshuvirwa nemutambi wese wenhabvu kuhwina mikombe yakasiyana.
“Mutambi wese wenhabvu shuviro yake kusimudza mikombe yakasiyana saka ini ndiri kufara nemukombe watakasimudza nechikwata changu. Uyu wange uri mukombe wekuhwina tikiti rekupinda muPremier League yekuno saka mwaka unotevera tichatamba nezvikwata zvikuru zvemuIceland,” anodaro.
Songani anoti ave kutotanga kuita gadziriro dzemwaka unotevera dzekutambira muPremier League umo mune nhabvu yepamusoro.
“Kwatananga ave makata, nhabvu yemuPremier League yave yepamusoro asi chandinoziva ndechekuti inotambika uye hakuna anofemera munhu mugotsi,” anodaro.
Songani naHadebe vanotevera vamwe vatambi vemaWarriors vakahwina mikombe yakasiyana kuEurope nekuAmerica.
Vatambi ava vanosanganisira Marvelous Nakamba uyo akambohwina mikombe inoti weKNVB Cup neVitesse yekuNetherlands mwaka wa2026/17, ndokuzosimudza weligi rekuBelgium weJupiler Pro League neClub Brugge mwaka wa2017/18.
Kuchiti Costa Nhamoinesu asati asendeka shangu dzake dzenhabvu, akahwinawo mikombe yakasiyana ari kuSparta Prague inoti Czech First League 2013/14, Czech Cup kaviri mwaka inoti 2013/14 uye 2019/20 neCzech Supercup 2014.
Nerimwewo divi, gamba renhabvu munyika Bruce Grobblaar akahwina mikombe 19 yakasiyana achitambira chikwata cheLiverpool, kusanganisira mukombe weUEFA Champions League.
Grobblaar ndiye ega mutambi wenhabvu kubva muZimbabwe akakwanisa kusimudza mukombe weUEFA Champions uye mumwe wevatambi vashoma kubva muAfrica vakasimudza mukombe uyu.
