Kwayedza
Muchaneta Chimuka
KWAKANGE kusingadanwi anonzwa kumakwikwi emitambo yepasichigare eChibuku Neshanwari Dance Festival national finals neMugovera ayo akahwinhwa nechikwata cheSekunjalo MaAfrica Arts Group chekuBulawayo icho chakaenda kumba neUS$15 000.
Chikwata cheYarira Ngoma Arts Group chemuHarare ndicho chakatora mubairo wechipiri chikaenda neUS$10 000, chichiteverwa neMarekare Dance Group yekuMashonaland East icho chakawana neUS$7 500.
Mutambo uyu waive nedingindira rinoti, “Bira Remadhanzi” “Sithokhozisa Ngezomgdo 60th Edition!” uye wakapindwa negurumwandira revanhu.
Dopiro iri raitsigirwa nekambani huru inobika doro nezvinwiwa yeDelta Co-orporation Limited yakabatana nesangano reZimbabwe National Traditional Dance Association.
Veruzhinji vakatamba sevachadambuka makumbo vachifarira vaimbi vane mukurumbira avo vakatsigira chiitiko ichi vanosanganisira Jah Prayzah, Nutty O naSelmor Mtukudzi uyo akaimba nziyo zhinji dzababa vake mushakabvu Oliver Mtukudzi.
Muzvare Patricia Murambinda, vanova general manager (corporate affairs) kuDelta, vanoti chirongwa ichi ndechimwe chezvikamu zvekudzorera kune veruzhinji munyaya dzemabhizimusi.
“Mitambo iyi yakaitwa panguva imwe cheteyo apo tinocherechedza kusvitsa makore 60 kubvira yakavambwa. Ticharamba tichivandudza chirongwa ichi kuti chigutse veruzhinji uye kubura zvipo zvakawanda zviri maringe nekudzoreredza tsika nemagariro evanhu vatema kuburikidza nemitambo,” vanodaro.
VaKennedy Machuruka, mutungamiriri wesangano reZimbabwe National Traditional Dance, vanoti vanofara nekubudirira kwakaita mitambo iyi.
“Tinofara zvikuru kuti chirongwa ichi chave nemakore 60 chichifambira mberi zvakanaka uye vakwikwidza vaenda nemibairo inovagutsa,” vanodaro.
Mimwe yemitambo yechinyakare yakaratidzirwa pazuva iri inosanganisira muchongoyo, mbakumba, jerusarema, chihodha, gule/nyau neamahiza.
